Tourism minister pu lalnghinglova hmar in ‘taxi pu titi’ lehkhabu tlangzarh
Vawiin khan Pu Lalnghinglova Hmar, Minister of State, Tourism Department chuan MINECO, Aizawla a office chamber-ah Pu H. Laldanmawia lehkhabu ziak ‘Taxi Pu Titi’ tih chu a tlangzarh. Lehkhabu tlangzarhtu Minister Pu Lalnghinglova Hmar chuan kum 2025 a Tourism Department in ‘Best Taxi Driver’ chawimawina an hlan Pu Laldanmawia lehkhabu tlangzarhnaah hian, “Taxi driver-te hi Tourism Department thlirnaag chuan kan tour guide te an ni a, kan information centre hmasa ber an ni bawk. Taxi driver kan neih that chuan tourism-ah kan thang dawn a, kan neih that loh chuan rel a lo lutte hi an lo kal nawn tawh lo mai thei. An lo kal nawn fo erawh chuan tourist hmun tha tak kan ni mai dawn a, chuvang chuan kan inkungkaihna hi a hnai em em a ni. Khualzin lo kal zawng zawng deuhthaw ten kan rama an rawn hman hmasak ber an nih avangin keini tan chuan an pawimawh hle a ni.” a ti.
Tourism minister chuan sawi belh zelin, “Taxi driver te hi Mizoram phurtute an ni a, mi chi hrang hrang an phur a, mikhualten a Mizoram chanchin chiang zawka an rawn hmelhriatna hmasa ber chu anni hi a, chuvang chuan Mizoram hi an phur a, an pawimawh tak zet a ni.” a ti a. “Taxi driver tam tak hi chu Mizoram tana pawimawh leh hnam tana mi hlu an ni. Chutiang chiah chuan thenkhatte chu an tangkai tluk zetin hnam tana pawi khawih thei an ni bawk.” tiin a sawi bawk. He lehkhabu ziaktu Pu H. Laldanmawia hi kum 2025 khan World Tourism Day-ah taxi driver tha lawmman dawng tura thlan a ni a. Amah hi veng chhung chanchinbu leh hmun hrang hrangah thu lo ziak tawh thin a ni bawk.
Lehkhabu thlirlawktu Dr. H. Laldinmawia chuan, he lehkhabu-ah hian thuziak tha tak tak 64 lai a awm thu sawiin, ‘Taxi Pu Titi’ tia a bu hmingah phuah a nih avang hian, a nuihzatthlak zawng te, a ngaihnawm lai deuhte awm tura ngaih a awl viau laiin, mihring nun infuih tharna lam lehkhabu ‘Motivational literature’ lehkhabu tha tak a nih thu a sawi. He lehkhabu hi phek 202 -a chhah, Rs. 250 man tur a ni. He lehkhabu tlangzarhna inkhawm hi Dr. Daniel Lalawmpuia’n a kaihruai a, Rev. JH Zahluna’n hunserh a hmang bawk.
