Agriculture Minister Pu PC Vanlalruata’n MASA Conference a hmanpui
Vawiin khan Agriculture & Farmers’ Welfare Minister Pu PC Vanlalruata chuan, Mizoram Agriculture Service Association (MASA) General Conference, Berawtlang Tourist Complex-ah a hmanpui.
Conference-ah hian thu sawiin, Minister chuan MAS officer indaih lohna a nasa hle a, post ruak te hnawhkhah a nih theihnan, a tul anga recruitment kalpui zel a tul thu a sawi a; MAS officer kalkhawm te an hnathawhna kawngah theihtawp chhuah turin leh, an hna chu farmer te tana hlawkna tur a ni tih hria a, sorkar scheme te bel taka zirchianga thawk turin a fuih.
Thawhhona kawngah pawh MAS officer te chu an fakawm a tih thu sawiin, posting chungchangah pawh harsatna siam lo va sorkarin a dahna pianga awm zel thei turin thu a chah nghal bawk.
Kan hnathawh te rawngbawlna angah ngai a, hah bik deuh te kan awm a nih pawhin, vui lovin Pathianin mipui leh farmer te tana rawngbawl tura min dahna a ni tih hriain, hna kan thawk tur a ni a ti.
Minister chuan Agriculture & Farmers’ Welfare Department-ah mipuiin beiseina sang tak an nei a, an beiseina te timit tu ni lovin, tihlawhtling tu ni thei turin a tul ang zelin mahni insiamrem a, sorkar leh mipui tan theihtawp chhuah zel turin MAS officer te a fuih. Inlungrual taka mi tinin theihtawp kan chhuah theuh chuan, kalphung thar, hma lam pan zel theihna tur danglamna kan thlen thei a ni a ti.
Conference-ah hian Mizoram hmun hrang hranga MAS officer te an kalkhawm a ni.
