Tourism Minister-in Development of Beraw Tourist Resort Project hnuaia khualbuk sak thar a hawng
Vawiin khan Tourism Minister Pu Lalnghinglova Hmar chuan Multipurpose Hall, Berawtlang-ah, ‘Development of Beraw Tourist Resort’ project hnuaia khualbuk sak thar a hawng.
He hunah hian khuallian Tourism Department changtu Minister Pu Lalnghinglova Hmar chuan thusawiin, Mizorama khualzinte thlenna tur khualbuk thar changtlung tak hawn theiha peih a ni ta chu lawmawm a tih thu a sawi a. Mizoramah chuan hnam dang khualzinte tana tlawh manhla tak tak tur thahnem tak a awm tih sawiin, “Tunhnaiah Mizoramah tourist an pung nasa a, tourism sector chu Mizoram tan sum hai luhna hnar tha tak a ni chho mek’” a ti. Khualbuk hawn thar chu tourism sector tana hmasawnna a nih ngei a beisei tih Tourism Minister chuan a sawi bawk.
Minister chuan 2024-2025 aiin 2025-2026 chhung hian Mizoram tlawhtu khualzin nuai 4 chuangin an pung tih sawiin, ram pawn atanga lo kal pawh kum hmasa aiin 9000 chuangin an pung, a ti a. Tourism sector chu mi tam tak tan eizawnna siamsak theitu a nih avangin, sawrkar leh mipui tanrual a ngai a, khawtlang hruaitute nen pawh inhrethiam taka thawh ho a tul a ni, a ti a. A hlawkna tak tak hmutu tur chu Mizoram mipuite an nih avangin, ram hmasawnna tura theihtawp chhuahpui zel turin kalkhawmte chu a fuih a ni.
Development of Beraw Tourist Resort project atan hian cheng nuai 606 sen a ni a. Khualzinte thlenna tur khualbuk (building) panga hawn thar niin, bedroom pahnih theuh a awm a, a bang atan hian hmun hrang hrang atanga lakkhawm lung tha bik hman niin, a chhung pawh khualzinte tana nuam thei ang ber tura chei mawi a ni.
MTDA Chief Executive Officer Pi R. Lalrodingi chuan programme kaihruaiin, Assistant Engineer Pu. K. Lalruatsanga chuan technical report a pe a. Tourism department hruaitute leh tlawmngai pawl- MHIP, MUP leh JAC-te bakah Local Council hruaitute an tel a. Tourism Joint Director Pi Lalthakimi Pachuau chuan lawmthu sawiin hun hi a khar a ni.
