Sericulture Minister Pu Lalthansanga hovin Mera Resham Mera Abhimaan (MRMA 2.0) workshop neih a ni
Vawiin khan Central Silk Board leh Sericulture Department tangkawp buatsaih, Workshop on Mera Resham Mera Abhimaan (MRMA 2.0) chu Sericulture Department Conference Hall, Chaltlangah neih a ni a. Sericulture Minister Pu Lalthansanga chu khuallian niin, Central Silk Board Joint Secretary (Tech.) Dr. Naresh Babu chu khualzahawm a ni.
Khuallian chuan MRMA 2.O neih a nih theihna tura hma la tute hnenah lawmthu a sawi a. MRMA 2.0 hian sericulture-a eizawngtute tan hmasawnna a thlen a, sericulture sector-in a tangkaipui ngei a beisei thu a sawi. Minister chuan sericulture-a eizawngtute chu theihtawp chhuah tura fuihin, Mizoram sik leh sa chu silk chin nana tha tak a ni a, silk chi li- Mulberry, Tasar, Eri leh Mugga pawh a chin theih, a ti a. Mahni zawnah theuh hmalam pana ke pen turin kalkhawmte chu a chah a ni.
Sericulture-a eizawngtute chu sawrkarin a ngaipawimawh a, sawrkar laipui-a Sericulture minister Pu Giriraj Singh-a nen pawh inkawmna nei tawhin, Mizoram chu silk siamchhuahna hmunpui ni tura hmalak dan tur an sawiho a. Thenzawl-a P3 Unit ( Mugga chi siamna) dinna turin Central Silk Board leh Sericulture Department Mizoram-te chuan MoU an sign bawk a ni.
Khualzahawm, Central Silk Board Joint Secretary Dr. Naresh Babu chuan MRMA 2.0 chungchang a sawifiah a, Sericulture Director Pu Lalrinawma chuan Mizorama MRMA 2.0 kalpui a nih dan chungchang a sawi bawk. Mera Resham Mera Abhimaan (My silk, my pride) hi Mizoram District pali- Aizawl, Saitual, Champhai leh Lunglei-ah te kalpui tura ruahman a ni.
Mera Resham Mera Abhimaan-hi India-in zalenna a neih kum 100-na, kum 2047-a khawvela silk thar tam ber ram nih a tumna kawnga hmalakna a ni a. MRMA 2.0-in a tum langsar zualte chu ram dang aṭanga silk lak luh tihtlem a, mahni ram chhung ngeia silk thar chhuah leh thawn chhuah tam te; sericulture farmer-te dinhmun siam ṭhat a, eizawnna ngelnghet an neih theih nana farmer-te hnena training leh technical support pek te; a bikin hmeichhiate leh ṭhalaite tana hna thawh tur siamsak te a ni.
