RD&AD Minister-In Khawzawl DPRC Office Leh Hostel Building Hawnna Hun Hmanpui| VC-TE Hnenah Computer Hlanin VC Danbu Tlangzarh Nghal
Vawiin khan Rural Development & Administration Department (RD&AD) Minister Prof. Lalnilawma chuan Khawzawla District Panchayati Resource Centre office leh hostel building hawnna hun a hmanpuia, Khawzawl district chhunga Village Council hruaitu palite hnenah Computer hlanin, VC Danbu a tlangzarh nghal. He hun hi Khawzawl Bawrhsap Pu K. Vanlalthiana chuan a kaihruai a, RD&AD Addl. Secretary Pu V. Lalengmawia, LAD Director Dr. Lalngura Tlau, Project Director Pu K. Lalhmuakliana leh Khawzawl SP Pu F. Lalbiakzauva te an tel a ni.
Minister Prof. Lalnilawma chuan thusawiin, VC-te thiamna leh theihna tihchakna tura training an neihna tur DPRC office leh hostel building tha tak hawn theiha a awm chu lawmawm a tih thu a sawi a. VC-te an inthawm chak theih nan leh khawtlang tan tha zawka hna an thawh theih nan VC Act thar, The Mizoram (Village Councils) Act, 2025 siam a nih thu a sawi bawk a. Minister chuan 15th Finance Commission hnuaia LAD tana fund kum thum chhung an dawn loh pawh kum khat chhungin an nawrchhuah tawh thu tarlangin, LAD, Directorate of Local Fund Audit leh PHE-te inkara thawhhona a that vang a ni, a ti a. 16th Finance Commission chuan VC-ten an mamawh inphuhruk thei tura mahnia sum an hailuh theih (own source of revenue) a ngaihpawimawh thu sawiin, VC hruaitute chu chutiang tura ngaihtuahna seng turin a chah a. National Panchayat Award 2025-a Clean & Green Panchayat category-a India ram pumah Kawrthah North Village Council chuan pakhatna a la chu lawmawm a tih thu a sawi a. Mizoram tungding tur chuan village council atanga bultan a ngaih thu sawiin, VC-te chu an hmazawn theuha theihtawp chhuah zel turin a fuih a. Vawiina hawn tak DPRC chu tangkai thei ang bera hmang turin duhsakanna hlanin, khawtlang leh Department hrang hrangte pawh phal taka hman tir turin a chah bawk a ni.
Hun kaihruatu Bawrhsap Pu K. Vanlalthiana chuan Khawzawl district-in DPRC building leh hostel tha tak an nei ta chu lawmawm a tih thu sawiin, Khawzawl mipuite chuan district-in hma a sawn zel theih nan sawrkarah rinna an nghah tlat thu a sawi a. LAD Executive Engineer Pu L.T. Lalrinmawia hnen atangin technical report nghaihthlak a ni a. LAD Director Dr. Lalngura Tlau chuan lawmthu sawiin hun a khar a ni.
DPRC office building leh hostel building sakna tur hian Ministry of Panchayati Raj (MOPR)RGSA atangin nuiah 100 ve ve dawn a ni a. Tender chhuah niin, building pahnih sa turin Zothan Consultancy Service, Luangmual, Aizawl thlan an ni a. Office building-ah hian Conference room 1, Office room 3, Meeting hall 1 leh toilet 6 a awm a. Hostel building-ah hian room 6, choka 1 leh toilet 7 a awm bawk a. RGSA scheme hnuaiah VC engemaw zat hnenah computer hlan a ni tawh a, pekchhuah tur a la awm bawk a ni.
Vawiin DPRC hawnna inkhawmah hian All Mizoram VC Association hruaitute, Khawzawl district chhunga VC hrang hrangte leh Khawzawl district chhunga Department hrang hrang Head of Office engemaw zat an tel a ni.
