PWD Minister-in East Tuipui Bial Khaw hrang hrang inkalpawhna kawng dinhmun a enfiah
Vawiin khan Mizoram PWD Minister Pu Vanlalhlana chuan Vangchhia, Leithum, Dungtlang, Khawbung, leh Farkawn khaw chhung kawng thawmthat tur a ruahmanna kal mek chu hmunah kalin a enfiah a, PWD Department hotu pawimawh leh technical officer-ten an tawiawm a ni.
He hunah hian Minister hian Farkawn khawtlang hruaitute kawmin khawtlanga hmasawnna tak tak thleng tur chuan sorkar leh mipui tanrual a pawimawh ber tih a sawi a. Sorkarin sum tam tak sengin hmasawnna hna thawk thin mah se, a hmun ngeia mipuite’n neitu rilru pu chunga an thlawp leh an vil ve loh chuan hmasawnna chu a tlo thei lo tih a tarlang a. Khawtlanga hmasawnna rahbi thar kai tur chuan khawtlang hruaitute, tlawmngai pawl leh sorkar hnathawkte lungrual taka an tanrual a ngaih thu a sawi.
