Minister Pu C. Lalsawivunga FOCAM conference hmanpui
Vawiin khan Aijal Club-ah Former Councillors’ Association of Mizoram Municipalities (FOCAM) inkhawmpui vawi 6-na neih niin, Art & Culture Minister Pu C.Lalsawivunga chu khuallian niin a hmanpui.
He hun pawimawh takah hian FOCAM member kalkhawmte hmaah khuallian Pu C. Lalsawivunga chuan thusawiin, ram thatna tur ngaihtuah leh hmasawnna kawnga ke pen chu mitin mawhphurhna a ni a ti a, inthliarbikna awm lova thawhho a tul tih sawiin, hemi kawngah FOCAM chu hmasawnna atana pawl tangkai tak leh inlungrual tak a nih thu a sawi bawk. Minister chuan mipuite’n hmasawnna an duh a, Municipality leh Corporators-te mawhphurna chu mipuiin an hrechiang chho mek a, Corporators-te chu Aizawl hmasawnna fawng vuantu pawimawh tak an nih thu tarlangin, hemi kawngah hian FOCAM chu corporator-te a tul huna puitu ni thei tura inhawng turin a chah bawk. Minister chuan Aizawl chu plan mumal awm lova din niin, hmasawnna tur leh siamthat ngai tam tak awm mahse, thlen chin atanga hmasawnna lam kawng zawh a, Aizawl chu India mai ni lo, ram dang mite pawhin ram nuam leh chenna tlak an tih ni tura tan la zel turin kalkhawmte chu a fuih bawk. Khawpui chhunga mi rethei leh chan chhe zawkte dinhmun chu veiawm a tih thu a sawi a, mi chan chhe zawkte chawikanna hna hi ram hruaitu kutah dah mai lovin, mahni theihna kawngah theuh hma la turin kalkhawmte chu a chah a, mitin tan hmasawnna thlen thei turin ram hruaitute chu thawhpui zel turin a sawm bawk a ni. Minister chuan Municipality tih hmasawnna tura sum awm: Urban Local Body grant, fees chi hrang hrang etc-te chu dik taka hmang turin FOCAM kaltlangin a sawm a, eiruknain a tihbuai loh municipality tha leh rintlak ni turin a chah bawk.
FOCAM Meeting ah hian Dan siamthat chu an agenda pui ber a ni a. Pu P.C Lalhmingthanga, FOCAM Secretary chuan FOCAM-in Pawl thiltum leh dinchhan 7-a neih thu sawiin member 38 – an awm mek tih a sawi a. FOCAM hian Mizoram-a Municipal awmte huam thinin Councillor ni tawhte a tel theih vek thin a, vawiin a Dan siamthat hnuah chuan Aizawl Municipal Corporation a Coun-cillor/Corporator-te chauh a huam tawh dawn a, Pawl hming pawh FORMER CORPORATORS’ ASSOCIATION OF AIZAWL MUNICIPAL CORPORATION (FOCAM) ti a thlak a nih thu a sawi bawk a ni.
