Media & Communication Conference ah Mizoram atangin Officer te tel; Enumeration Form Digitisation ah Mizoramin hma a hruai
Ni khat awh Election Commision of India (ECI) Media & Communication Conference, India International Institute of Democracy and Election Management (IIIDEM), New Delhi ah Joint CEO Pi Ethel Rothangpuii hoin Mizoram State leh District Media Nodal Officers te an tel.
Special Intensive Revision (SIR) chu India ram State 16 leh UT 3-ah kalpui mek a ni a. Enumeration Phase a awm mek state te zingah Mizoram chuan Digitisation ah hma hruaiin 68.05% zawh tawh a ni a. Anmahni hnaih bertu Manipur chuan 27.11% zo tawhin pathumna Odisha chuan 17.58% an zo tawh a ni.
He Conference hi zing dar 8:45 ah tanin tlai dar 6 thleng neih a ni a. Director General (Media) Pu Ashish Goyal chuan thu sawiin India ram pumpuia election felfai kalpui tura media pawimawhzia leh, mipuiten election ah rinna an nghah theihna tura media officer te pawimawhna a sawi a. Hemi hnu hian Director General (IT) Dr Seema Khanna leh ECI Media Division hotute – Pu Apurva Kumar Singh, Deputy Director; Pu P Pawan, Deputy Director; Pi Gouri S, Assistant Director ten presentation an nei a. Awareness campaign neih dan te, fake news (thu dik lo thehdarh) do let dan te leh pawimawh dangte sawiin thlalak leh video hmangin kalkhawmte an zirtir a ni.
Anni bakah hian tun hnaia SIR neih tawhna state Rajasthan, Kerala, Tamil Nadu leh West Bengal atang tein Media Nodal Officer te hmalak dan ngaihthlak a ni a. SIR an lo kalpui tawh dan sawiin an thil dawn leh harsatna an tawh thenkhat atanga mipui zirtirna leh SIR chungchang thehdarhna kawnga thil tha an hmuhchhuah te, thalaite chawhphur nana Electoral Literacy Club (ELC) an hman tangkai dan te an sawi a. Booth Level Officer, Booth Level Agent, Polling Agent leh Counting Agent te pawimawhna tar lanna lemchan tawi (skit) thlir ho niin, sawi hona hun hman a ni bawk.
