Speaker pu lalbiakzama’n sesawng ah joint yma cultural day a hmanpui
Assembly House Speaker Pu Lalbiakzama, Chalfilh bialtu MLA ni bawk chuan vawiin khan Sesawng Joint YMA in Zo Ni (Cultural Day) programme, Sesawng playground-a an buatsaih chu khuallian niin a hmanpui. Khuallian chuan thu sawiin, mahni hnam zia (culture) leh nunphung (tradition) hi mahni hnam innghahna lungphum pawimawh tak a nih thu sawiin, chumi chawm nung zel tura Sesawng Joint YMA in Zo Ni an buatsaih chu lawmawm a ti a. “Hnam hrang hrang awm khawmna India ram angah hian kan hnam nun kan vawn tlatna hian kan ram mawina leh ropuina a tizual a; Hnam dang laka kan zahawmna pawh a ni,” a ti.
Speaker chuan tunhnaiah India ram chhung leh pawn lam atangin khualzin tam tak ten Mizoram rawn tlawhin, social media-ah video leh thlalakte tarlangin Mizo hnam zia leh nunphung a tha zawngin an tarlan thu a sawi a. Mizoram chhunga cheng zawng zawng te ṭanrualna avang a ni a ti a. Kan pi leh pu aṭanga kan lo inhlan chhawn tawh ‘Tlawmngaihna’ leh ‘Aia upa zah’ te hi kan nunpui tlat tur a ni a ti a. Chumi bakah chuan pi pu zai (Folk Song) leh hnam lam (Folk Dance) te, pi pu thawnthu (Folk Tales) te leh hnam thuam (Traditional Dress) te hi ṭhangtharte hnenah kan hrilhhriat reng a pawimawh hle a ti bawk.
He programme hi Sesawng Joint YMA ten khaw chhunga branch hrang hrang-te nen inlungruala an buatsaih a ni a. Chawhma lamah naupangte nen hun hman niin lam hrang hrang te an entir a. Chumi hnu ah YMA branch tinte inelna hun leh concert in a chhunzawm a ni.
