Lungleiah LMC Chairman Pu Lalzuithanga’n in tina sem tur bawlhhlawh bawm a vai liam
Vawiin khan Lunglei Municipal Council (LMC) huam chhung in tina sem tur bawlhhlawh bawm chu LMC Chairman Pu Lalzuithanga’n Lunglei Convention Centre aṭangin a vai liam.
LMC Chairman Pu Lalzuithanga chuan LMC-in hma lakna hrang hrang a neih zingah bawlhhlawh sawngbawl chu LMC hma lakna pawimawh ber zinga mi a nih thu sawiin, chumi atana paiwmawh tak bawlhhlawh bawm sem theih a ni chu lawmawm a tih thu a sawi a. Mipuite’n faina kawnga rahbi thar kaina atan ṭangkai taka hmang turin a chah.
Bawlhhlawh bawm sem tur vai liamna hun hi LMC Chief Executive Officer Pu Lalhmansanga chuan kaihruaiin, LMC-a councillor-te leh official-te bakah, Local Council ai awhte an tel a. LMC Vice Chairman Pu K. Lalrinawma pawhin thu sawiin, bawlhhlawh bawm lei kawngah leh thil dangah dik tak leh lang tlang taka thil kalpui a nih thu sawiin, Lunglei khawpui chu Mizoram khawpui fai berte zinga mi a nih tawh bakah, fai kawngah hma sawn chhoh zel tum a nih thu a sawi.
Bawlhhlawh bawm hi LMC huam chhunga chhungkaw tin tan sem tum a ni a. Naktuk khian Sazaikawn leh Hauruangah sem leh tura ruahman a ni.
