Lungleiah LMC Board of Councillors ṭhut khawm ṭum 11-na buatsaih a ni
Vawiin khan Lunglei Municipal Council (LMC) Board of Councillors (BoC) chu an Chairman, Pu Lalzuithanga kaihhruaiin Lunglei Convention Centre-a BoC Meeting Hall-ah a ṭum 11 nan an ṭhu khawm. BoC ṭhu khawm chuan ‘The Mizoram Urban Areas Building Regulations, 2024’ chu Lunglei Municipal Council huam chhungah hman turin lungrual takin an pawm tlang a. LMC aṭangin ‘The Lunglei Municipal Council Building Regulations, 2023’ chu Mizoram sawrkarah pawmpui tura theh luh a nih laiin, sawrkar chuan ‘The Mizoram Urban Areas Building Regulations, 2024’ hmang zawk turin rawtna a siam a. He rawtna zul zui hian LMC huam chhungah he Regulations hi hmang turin BoC chuan thu tlukna a siam a ni. LMC huam chhunga mihring cheng leh chenna in awm zat chhinchhiahna, official data rin tlak tak a awm theih nana Directorate of Economics & Statistics Department, Aizawl te nen thawk hova LMC huam chhunga chhiarpui (demographic census) kalpui tura sum senso tur ruahmanna siam ṭhatna chu vawiin BoC ṭhu khawm hian thlir hovin, sum senso tur zat cheng nuai 7.5 (₹ 7,50,000/-) leh a hmanna tur ruahmanna chu a pawm a. BoC ṭhut khawm hmasaka LushAlTech te nen thawh dun remtih a nih angin LushAITech lam dawr an nih hnuah, cheng nuai 25 (₹ 2,50,000/-) sengin LMC tana Artificial Assistance Apps siam theih a nih tur thu dawn a ni a. Hei hi BoC chuan pawmin, Memorandum of Understanding (MoU) te siama hma lak nghal ni se, an ti bawk.
Mizoram sawrkar thu chhuakin sawrkar aṭanga hlawh la reng rengin Mizoram Universal Health Care Scheme (MUHCS) zawm tur a tih chu LMC Office-ah pawh hman a nih theih nan vawiin BoC ṭhut khawmah hian sawi ho niin, MUHCS hi a nih anga pawm remtih tlan a ni a. LMC hnuaia bawlhhlawh paih man (sanitation fee) hmuh aṭanga faina hna thawk (sanitation worker) mi panga (5) chhawr mekte lawmman tihpunna tur pawh pawm a ni bawk. Vawiin BoC ṭhut khawmah hian Chairman chuan LMC hnuaia hma lakna hrang hrang tar langin, Licensing Regulations hnuaiah phalna (licence) 2,237 pek chhuah a nih tawh thu leh in sak dilna (building permission) lut 338 zingah phalna (No Objection Certificate) pek chhuah 233, nghah mek 92 leh pek theih loh 13 a awm thu a tar lang a. Advertisement & Hoardings chu tender hmanga kalpui a nih thu leh Pukpui-AOC Ramthar kawngpui (main road) tender area chhangtu mi 3 hnenah appointment pek fel tawh a nih thu tar langin, tendered area baka dilna lut tawh 26 chu a vaia phalna pek fel a nih thu a tar lang a.
Vawk leh ui khuahkhirhna dan (Temporary Guidelines) hman mekah local council-te kutah mawhphurhna hlan fel a nih thu te, block 46 atan parking tender chhanna hun hawn mek a nih thu te, Solid Waste Management Centre-I hnuai aṭangin ward tinah bawlhhlawh bawm (dust bin) 450 ṭheuh sem a nih thu leh Garbage Truck motor – 407 pakhat leh Pik-up 2 inhlan fel tawh a nih thu te, Solid Waste Management Centre hnuaiah IEC component atangin cheng nuai 10 dawn a nih thu leh mipui hnena inzirtirna kalpuina tur leh ṭul danga hman tur a nih thu te a sawi a. Property tax chungchangah Online Payment Apps tihfel a nih hnuah mipuiah an pek tur zat puanzar a nih tawh thu leh August ni 4, 2025 thleng sawi buaina hun hawn a nih thu sawiin, mi eng emaw zatin chhiah an pek ṭan mek thu leh tihdik ngai leh zir chian ṭhat ngaiah hma lak mek a nih thu a tar lang bawk.
