Lunglei Sr CMO Staff Welfare te’n Lunglei District aṭanga Florence Nightingale Award dawngtute lawmpuina hun an hmang
Vawiin khan Lunglei District Senior Chief Medical Officer (SCMO) Staff Welfare chuan Lunglei SCMO Conference Hall-ah India ram puma nurse hna thawk ṭha chawimawina, National Florence Nightingale Award dawngtute – Pi Vanlalthuami (Health Supervisor, Ayush Health & Wellness Centre, Theiriat) leh Pi Lalenthangi Hnamte (Health Worker, Ayush Health & Wellness Centre, Tuichawng) te pualin lawmpuina hun an buatsaih.
District TB Officer Dr K. Lalhmachhuana’n hun kaihruaiin, Pu H. Lalthangliana’n hunserh a hmang a. Lunglei SCMO Dr Lalrinthangi chuan Lunglei District aṭanga India ram pum huapa hna thawk ṭha chawimawina dawng thei an awm chu chhuanawm leh lawmawm a tih thu sawiin, mi dang pawhin entawn zel turin a chah a. Hriselna lama thawktute chu mipuite tan an pawimawhna hre chiang a, mahni hna ṭheuh rinawm leh ṭhahnem ngai taka thawk zel turin a fuih bawk.
Award dawngtute hi SCMO Staff Welfare hmingin chawimawina thuziak leh thilpek hlan an ni a. National Florence Nightingale Award 2020 dawngtu Pi Vanlalthuami leh NFNA 2026 dawngtu Pi Lalenthangi Hnamte te chuan an hna thawhna avanga Award dawng theia an awm chu lawmawm an tih thu sawiin, department hotute leh an thawhpuite nena thawh hona ṭha tak an neih vang a nih thu an sawi a. Thawktu hrang hrangin lawmpuina thu sawi bawkin, Deputy CMO Dr Vanlalngheti’n lawm thu sawiin hun a khar.
