Lunglei District Bawrhsapin NH–54 & 302 kawngpui zauh leh siam ṭhat hna thawh meka hmasawn dan a hmunah a enfiah
Vawiin khan Lunglei District Bawrhsap Pi Navneet Mann chuan National Highway–54 & 302 kawngpui laih zauh leh siam ṭhat hna thawh meka Theiriat–Hrangchalkawn, Lungpuizawl–Zobawk leh Sazaikawn–Hauruang huam chhunga hma lakna hrang hranga hmasawn dan leh hmachhawp awmte chu a hmunah kal chilhin a enfiah.
Bawrhsap hi DDMA Zonal Officer-te, DC, I&PR leh Revenue official-te, kawng siam mek enkawltu NHIDCL (National Highways & Infrastructure Development Corporation Limited) leh hna thawktu contractor BRN Infrastructure Private Ltd te’n an ṭawiawm a. Hna kal meka hmasawnna awm dan en hovin, hma lak zel dan tur leh harsatna hrang hrang chin fel dan tur te an sawi ho.
Aizawl–Tuipang NH–54-ah hian Zobawk leh Lungpuizawlah hna thawh mek awmin, kawng laih zauh, lung rem siam, kawng chhuat siam rem leh kawng luan hna te thawh mek a ni a. Lunglei –Tlabung NH–302 hna thawh kal mekah Hrangchalkawn aṭanga Mizoram Polytechnic Lunglei panna kawng (approach road) siam mek te, Theiriata T-Way Filling Station bul lei minna lai lung rem leh kawng luan mek te, Sazaikawn leh Hauruang inkara hna thawh mekte en dik a ni bawk a. Hna thawh danah hma lakna leh hmasawnna hrang hrang hmuh niin, hmun ṭhenkhat erawh chak lehzuala hma lak ṭul tih a ni a. Bawrhsap chuan fur laia mipuiin harsatna an tawh lohna tur leh chhiatna thleng thei pumpelh nan contractor-te chu chak zawka hma la tura hrilhin, fur hmaa kawng an luan hman loh turte pawh ṭha taka enkawl leh thawm ṭhat hna thawk turin a chah.
