Kolasib-ah ilp dan bawhchhia te chungchang ngaihtuahin thukhawm
Vawiin khan DC Conference Hall, Kolasib-ah District chhunga Inner Line Permit (ILP) dan bawhchhia te chungchang ngaihtuah leh hmalak dan tur relin, Additional Deputy Commissioner (ADC) Pi B. Malsawmtluangi hovin thutkhawm a ni. Thutkhawmah hian ILP nei lo leh ILP hun tiam pel (expire) tawh te dap chhuah leh enfiah an nih theih nan, Police Officer-in-Charge (OC) ten kar khatah vawi khat tal routine inspection an neih ziah thin thu tarlan a ni a. ILP dan khauh zawka kalpui dan tur leh dan bawhchhia te hremna pek dan tur te uluk taka sawiho a ni. ILP hmanga hnathawk leh midang rawn lut te lakah hian a latu (sponsors) ten mawhphurhna lian tak an neih thu leh, an mawhphurhna te tha taka hlen chhuak tura beisei an nih thu sawi lan a ni bawk.
ILP endik leh dan kengkawh tur hian khawtlang hruaitu Village Council (VC) leh YMA te nena thawhho a pawimawh zia sawi ho a ni a. Hemi bawhzui hian thla thar May chhung khian sub-divisional level hrang hrang – Kolasib, Kawnpui, Vairengte leh Bairabi ah te tlawmngai pawl (NGO) te nen tanghovin Joint Inspection neih nise tiin thutlukna an siam a ni.
He thutkhawmah hian SDO (Sadar) Pu H. Lalramliana, SDO (Civil) Bairabi Pu Chinlianmanga, SDO (Civil) Vairengte Pu H. Vanlalbiakzauva, SDO (Civil) Kawnpui Dr. Doris Lalrinawmi, SDC (ILP BO) Pu Lalremsiama Darchhun, DC Office Kolasib a thawktu Pu H. Vanlalthanga leh Pu Samuel Lalremruata, Bairabi Police Station aiawhin SI Arvind Kumar leh Vairengte Police Station OC Pu Lalramnghala te an tel a ni.
