Khawzawlah Outreach Programme for Legal Awareness Campaign neih a ni
Vawiin khan Zaingen Branch YMA hall, Khawzawlah District Legal Services Authority, Champhai leh District Child Protection Office-te bultumin Outreach Programme for Legal Awareness Campaign neih a ni a, Khawzawl Bawrhsap, Pu K. Vanlalthiana’n a hmanpui a, Resource Person atan Pu Vanlalruata, MJS, Principal Magistrate, JJB&JMFC, District Court, Champhai Judicial District chu hman a ni.
He campaign hun hi Pu James Lalthangmawia, DCPO, Khawzawlin a kaihruai a, Bawrhsap, Pu K. Vanlalthiana chuan Legal Awareness programme buatsaih a ni chu lawmawm a tih thu sawiin, he hun hi a pawimawh em avangin rilru leh ngaihtuahna zawng zawng senga hmang turin kalkhawmte a sawm a. Khawtlanga kan chenhona kawngah dan hriat a tul a, dan hriatloh hi chhuanlam a tlinloh thu leh dan kan neih te hre zau zel tura inzir a tulzia thute, naupang leh hmeichhiate chunga hleilenna chungchangah dan ang taka hma lak thin a tul thute a sawi a, awlsam taka inngaihdam leh mai hi thil tha ber a nih loh thu leh dan kan hriat ang te a taka nunpui a tul bakah midang te zirtir ve zel tul a tih thu a sawi bawk a ni. Naupang leh tleirawlte laka hleilenna te hi social media a thehdarh a thatloh zia sawiin, nupui/pasal zawnna leh eizawnna thlenga nghawng nei thei a nih avangin social media a thehdarh hi dan kalh a nih thu a sawi. District Legal Services Authority te leh District Child Protection Unit (DCPU) te’n Khawzawl District tana programme an buatsaih chu District tana hmasawnna a nih ngei a beisei thu a sawi bawk a ni.
He hunah hian Resource Person, Pu Vanlalruata atangin naupang harsatna tawk, tanpui ngaite dan ang taka tanpui tura hmalak dan tur bakah naupang kum 18 hnuailam dan bawhchhia te chunga hmalak dan tur te a sawi a. District Legal Services Authority chuan district chhunga mi rethei leh harsa zawkte, naupangte leh mi dangte hnenah man nei lova dan ang taka a tanpui thin thu sawiin, an dikna leh an chanvo humhalh sak hi mitin mawhphurhna a nih thu a sawi a, Interaction hlawkthlak tak hman zui nghal a ni. He hunah ah hian dan lekkawh chungchanga mawhphurtu department hrang hrangte an kal a ni.
