Excise & Narcotics Department Commissioner endikin Hnahthial District Assistant Commissioner Office-a thawktute tan Annual Inspection nei
Vawiin khan Excise & Narcotics Department Commissioner, Pu Z. Lalhmangaiha endikna hnuaiah Hnahthial District Assistant Commissioner Office-a thawktute tan Annual Inspection neih niin mamawh leh duhzawng sawina hun – Durbar chu hman nghal a ni a. He hun hi Hnahthial District Excise and Narcotics Assistant Commissioner, Pu Malsawmdawngzela chuan a kaihruai a ni.
Commissioner chuan Hnahthial District tiamin District thar office tinte chu sawrkar duhsakna zarah Assistant Commissioner awpin a lo awm tak thu a sawi a. Hnahthial District-a an office pawh hian mahni a inrelbawlna hran an neih theih nan tun Financial Year tharah LOC charge an neih hman ngei a beisei thu a sawi bawk.
Commissioner chuan transfer and posting chungchang sawiin uluk taka ngaihtuah hnuah department that nan mai bakah transfer turte chhungkaw dinhmun en chunga siam a nih thin thu a sawi a. Awmna hmun hrehawm deuh pawh ni se puitling taka tuar zel tura fuih in “Quantity-ah tam lo mah ila Quality lam ngai pawimawh ila, mahni hna theuh chu hlim tak leh zah taka thawk chungin lungawi tak leh chapo lovin i thawk tlang ang u” tiin Hnahthial District office a thawktute hnenah fuihna thuchah a sawi a ni.
Durbar hunah hian office-a thawktuten an mamawhnate thlenin program chu SI, Pu F. Lalronghaka’n lawmthu sawina nen a khar a ni.
Tun dinhmunah hian Hnahthial District Assistant Commissioner of Excise and Narcotics Office hnuaiah hian thawktu 10 awm mekin Assistant Commissioner hona hnuaiah OC pakhat, SI pakhat Head Constable pakhat, Constable panga leh 4th Grade pakhat an awm mek a. Constable pakhat in a rawn zawm belh thuai tura beisei a ni bawk.
