Dm&r minister prof. Lalnilawma’n “khuarel” app a tlangzarh
Vawiin chawhnu khan Secretariat Conference Hall No. 1, MINECO-ah Disaster Management & Rehabilitation Department leh Buannel Geo Solutions & Services te ṭangkawp buatsaihin; Disaster Incident & Reporting Management System “Khuarel App” tlangzarhna hun hman a ni a. DM& R Department Minister Prof. Lalnilawma chuan “Khuarel App” chu a tlangzarh.
Tlangzarhna thu sawiin, DM&R Department Minister Prof. Lalnilawma chuan Khuarel chhiatna a lo thlen thula mipui mimir, DM&R leh State & District Disaster Management Authority ( SDMA& DDMA) ten rang taka chanchin an inhrilhhriat zung zung theihna leh chhiatna lam thil record data felfai taka dah ṭhat theihna tur ni nghal bawk “Khuarel App”, DM&R Department leh Buannel Geo Solutions & Services ṭangkawp ten an lo duangchhuak chu lawmawm a tih thu sawiin, Mizoram tan thil chhinchhiah tlak tak a nih thu leh Mizoram chu India hmar chhak State te zinga hetiang App changkang tak nei hmasa ber kan nih thu a tarlang a. Minister chuan Mizoram mipui te chu he Khuarel App hman awlsam leh ṭangkai tak hi download a, hmang ṭangkaitu nih tum ṭheuh turin a chah bawk.
Vawiin programme khuhhawnna thu sawitu Pu Udit Prakash Rai, Commissioner & Secretary, DM&R pawhin Khuarel App ṭangkai tur zia sawiin, mipui ten khuarel chhiatna thleng report chu DM&R department leh DDMA te an hriattir zung zung theih bakah, DM&R Department leh DDMA lam aṭang pawhin khuarel chhiatna chungchanga mipui te hriattur pawimawhte chu he Khuarel App kaltlang hian an puang darh zung zung thei tawh dawn a ni. Hei hian Khuarel chhiatna lama hmalakna a tih chak bakah Mizoram chhunga District hrang hrangte leh Department hrang hrangte inkarah thawhhona a tichakin; a ti awlsam hle dawn a ni, a ti.
Buannel Geo Solutions & Services te chuan “Khuarel App”chu a kalhmang leh a app hman dan sawi fiahna neiin ‘Demo Presentation’ an nei bawk a, he presentation-ah hian Khuarel App hman dan tur chu kimchang zawkin tarlanna hun an nei a ni.
Pu Chuauhnuna, Director DM&R chuan lawmthu sawinain vawiin Khuarel App tlangzarhna hun chu a khar ta a ni.
