Bana kaih hnuaia district level tour guide training 2nd batch kharna hun hmang
Vawiin khan Bana Kaih hnuaia ‘District Level Tour Guide Training Batch II’ kharna State Institute of Rural Development and Panchayati Raj (SIRD&PR), Durtlangah Dr. Irene Zohlimpuii Chongthu, Additional Secretary, Tourism Department, chuan khuallian niin hun a hman pui.
Tour Guide Training Batch II kharnaah hian khuallian chuan hnam dang lo kalte kan inpawlhdal tir tur a nih loh thu sawiin kan Kristianna te hloh lova, kan nungchang vawng reng turin training chhuak te chu a chah a. Tour guiding chu art chi khat a ni tih sawiin, kan hmunhma neih te leh kan culture te bel a thiam taka thawnthu anga hrilh a pawimawhzia a sawi bawk. Kan hnaah rilru leh tihtakzeta kan inpek chuan kan hlawhtling zel dawn thu a sawi a. Tour guide training pass chhuak zawng zawng te chungah lawmthu sawi pahin tour guide tha tak ni tur leh ram aiawha mikhual lo dawr tur an nih avangin professional taka awm turin a chah. Tun training hi a tawpna ni lovin inzir zawm zel turin a fuih bakah midang zirtir chhawng leh thei ila tih thu a sawi bawk a ni. Thahnemngai taka tour guide hna thawk chho turin duhsakna sang ber a hlan a ni.
Training kharna programme hi Dr. Malsawmdawngliani Fanai, Asst. Professor, SIRD&PR in kaihruaiin, Pu Lalchhandama Lailung, Sr. Core Faculty, SIRD&PR chuan training programme chungchang report a pe a. Trainee aiawh atangin thusawina hun hawn a ni bawk. Pi Lalthakimi Pachuau, Joint Director, Tourism Department in lawmthu sawina hun a hmang a ni. Sorkar flagship programme Bana Kaih hnuaia sponsor dawn kaltlangin Training Institute changtlung taka training buatsaih a ni thei leh, mipui ten ngaihluin training an rawn tel hi Mizoram tourism hmasawnna zel ani tih sawiin lawmthu a sawi nghal bawk a ni.
Tour Guide training hi Tourism Department in khualzinte mumal zawka enkawl an nih theih nan a duan niin, mi 110 training tura ruahman a ni a. Batch hmasa ah mi 35 tan March thla khan training hlawhtling taka neih pui a lo ni tawh a, tun hi a batch hnihna niin Batch-II-ah hian district hrang hrang atangin trainee 39 an tel a ni. Training hi 16 April atanga 29 April 2026 chhung neih a ni a, tourism lam hriatna, personality development, soft skills leh field visit hmangin practical training pawh neihpui an ni. Batch dang pakhat May thla hian Batch tawp ber atan neih leh tura ruahman a ni. Training tawp ah hian exam leh viva voce neih a ni a trainee zawng zawng hlawhtling takin an paltlang vek a, exam ah hian pakhatna Rosangzuali Chawngthu, Bethlehem Veng, Aizawl niin, pahnihna Ramengmawii, Rengdil, Mamit a ni a, pathumna chu Lalduhawma, Reiek a ni.
Hlawhtling taka training chhuak te chu Tourism Department atangin Provisional Certificate kum khat chhung atan leh ID pek an ni a, an tih that dan a zirin kum khat hnuah kum 2 atan register an ni leh dawn a ni.
