Chief minister leh union minister pu rajiv ranjan singh inkawm

Vawiin tlai khan Chief Minister Pu Lalduhoma chuan a Bangla-ah Mizoram tlawha lo zin Pu Rajiv Ranjan Singh, Union Cabinet Minister of Panchayati Raj, Fisheries, Animal Husbandy & Dairying chu a kawm. Union Minister hian Aizawl a rawn thlen rualin Chief Minister Bangla hi a pan nghal a, Pu George Kurian, Union Minister of State for Fisheries, Animal Husbandry & Diarying leh central official lianten an rawn zui a ni.  Chief Minister hian Mizoram a rawn tlawh avangin Union Minister hi lawmthu a hrilh a. Mizoramin a hlawkpui ngei a beisei thu hrilhin, a cham chhunga hun nuam tak hmang turin duhsakna a hlan a. Fisheries leh AH & Vety lama Mizoram mamawh hrang hrangte a sawipui a ni.

Union Minister hian Mizoramin mamawh a lo thlen tawh Whole Sale Fish Market sakna te, Integrated Aqua Park sakna tur te, Paddy cum Fish Culture district tam zawka cluster kalpui te chu tihhlawhtlinsak a tum thu Chief Minister hi a hrilh a. Sangha dil thar laihna te, a awmsa tihlen leh cheina te, sangha khawitute tanpuina lam hmalaknate chu Prandhan Mantri Matsya Sampada Yojana (PMMSY) 2.0 a rawn chhuak thuai dawn tih hrilhin, Mizorama a kalpui dan tur tha in mamawhte chu rawn thehlut ula, PMMSY 2.0 ah hian bilh luh kan tum dawn nia, a ti.  Mizoram hi sanghaa intodelh mai lo va, thawnchhuak thei khawpa hlawhtling ni ula kan duh a, hma insawnna tur project rawn thehlut ula, kan lo tanpui (support) ang che u, a ti.

Chief Minister thu thlen dang: Milk Processing Plant dinna tura central scheme kalpui mek, state share-a 25 a ni thin kha scheme thar kan siam mek a, central leh state share hi 90:10 a ni tawh dawn a. In project te chu scheme thara thun tura tih a thain a rinawm, a ti a. Mobile Veterinary Unit sanction pawh in mamawh zat rawn sanction che u kan tum ang a, sanction in hmuh tawh chin kha lo kalpui phawt ula, rawn sanction leh kan tum dawn nia, a ti.  Transport Subsidy for Animal Feed pawh hi kan lo bawhzui ang a. Ran chaw (Animal feed) lam hi chu Mizoramah hian nasa zawkin kalpui (local plantation uar) ila, a tha berin ka ring, tiin Chief Minister thu thlente hi bawhzui a tum thu a sawi a ni. Union Minister hi Lengpui Airport-ah Minister pahnih Pu C. Lalsawivunga leh Pu Lalthansanga te, official pawimawhten an lo hmuak a. Chief Minister nena an inkawmnaah pawh an tawiawm nghal a ni.