Khawzawlah district quality assurance committee a vawi khatna atan thukhawm
Nimin khan Khawzawl District Quality Assurance Committee (DQAC) chu a vawi khatna atan Addl. Deputy Commissioner Pu K. Zorammuana kaihhruaiin DC Conference Hall, Khawzawlah an thukhawm. DQAC hian Khawzawl District hnuaia public health facilities awm te- District Hospital, Community Health Centre (CHC), Primary Health Centre (PHC) leh Health & Wellness Centre (H&WC) ten National Quality Assurance Standards (NQAS) an phak ve theih nan leh State leh National level a Certification an neih theih nan Committee hi Quarter tinah vawi khat an thu khawm dawn a ni.
Khawzawl District Chief Medical Officer (CMO) leh DQAC Convener ni bawk Dr. Shahnaz M. Zothanzami chuan member kalkhawmte hnenah Khawzawl District hnuaia public health facility awmte NQAS-a an dinhmun a hrilh a. PHC Rabung, Khawhai leh Kawlkulh te hi NQAS State leh National level-a certified tawh an ni a, CHC Biate hian State level Certification dawng tawh mahse National level Assessment hi an la hmachhawn lo a. District Hospital, Khawzawl hi PHC atanga DH standard-a endik (assess) an nih avangin harsatna leh phak tawk lohna a la awm a, NQAS internal assessment ah 75% hmu lo nachungin external assessment hi vawi 2 an nei tawh a, endiktute (assessor) pawhin hmasawnna tawmtak an hmuh thute an sawi a.
District Hospital complex thar hi sak mek a nih angin Doctor kalkhawmten duh anga hma an lak theih loh thu te an sawi a ni. H&WC te pawh an hmun hma leh infrastructure-in a zir loh avangin Internal assessment-ah inziah tlin har an tih thu DPM Pu Laldinsanga’n committee member te a hrilh a. Harsatna leh certification hmu thei tura NQAS thil phut la phak tawk lohnate thlir ho a nih hnuah Chairman chuan DH atan roadmap siam turin Member Secretary leh Sr. Medical Officer Dr. Lalzikpuii leh HWC tan roadmap siam turin DPM te a chah a. Roadmap hi thutkhawm leh huna enho tur a ni.
