Assembly Speaker-in 30th AMKA State Level Karate Championship 2026-27 a hawng
Vawiin khan Mizoram Assembly Speaker Pu Lalbiakzama chuan Dawrpui Multi-purpose Hall, Aizawl-ah, ni thum chhung (03-11-2026 atanga 05-11-2026) awh tur 30th AMKA State Level Karate Championship 2026-27 chu khuallian niin a hawng a. Lt. Col. Clement Lalhmingthanga MLA, Champhai South bialtu chu khualzahawm a ni.
Hawnna puala inkhawmah hian khuallian Mizoram Assembly Speaker Pu Lalbiakzama chuan thusawiin, Infiamna huang dangte nen pawh khaikhina Mizote kan mikhual lohna tak leh International level thleng pawh medal engemaw zat kan hlawhchhuah tawhna Karate-a inelna hun AMKA-in a buatsaih leh thei ta chu lawmawm a tih thu a sawi a. AMKA chu infiamna bil pual pawl rin tlak ber te zing a mi, MSSC pawhin Golden Jubilee a lawmna, kum 2025 chhung a ‘MSSC Best Performing Sports Association of the Year’ a a lo thlan hial tawh a ni tih a sawi a. Tun dinhmunah Karate chu Asian Games leh Commonwealth Games-ah ngawt pawh medal la phate tan chuan a sum leh pai ang pawha hnemhnanpui tham a ni tawh avangin mizo thalaite tan chuan thahnemngai taka beih tlak a ni tih a sawi a. Pawl hruaitute thawhrimna chu chhuanawm a tih thu sawiin, tha thlah lova bei zel turin a chah a. Speaker chuan Championship-a telte chu inelnaa lawmman an dawng kher lo a nih pawhin an inpuahchhahna mahni inthununna leh zahawmna an hlawhchhuahte chu thil chhenfakawm tak a ni tawh tih hre turin a fuih a, Championship chu hlawhtling taka hmang turin duhsakna a hlan nghal a ni.
Hawnna hun hi Rev. Dr. Lalchawimawia, Vice Chairman Organising Board chuan kaihruaiin kalkhawmte lawmna thu a sawi a. Sensei Lalramthara, Gen. Sect AMKA chuan pawl hmalakna report tawi pein, kalkhawmte inhmelhriattirna hun a hmang a. Shihan C Dosangvung, Sr. Vice President, AMKA chuan thu a sawi a. Demonstration: Senior Instructor AMKA lam atangin Demonstration neih a ni bawk.
