Chief minister-in youth entrepreneurship summit 2026 hmanpui

Vawiin khan Chief Minister Pu Lalduhoma chuan Woodland Hill, Zonuamah Mizoram Entrepreneurs’ Chamber buatsaih Youth Entrepreneurs Summit (YES), 2026 a hmanpui.

Thu a sawinaah Chief Minister chuan, he hun rawn hmanpui che u ka phur hle a, ka tui zawng tak mai a ni a. A buatsaihtute chungah pawh ka lawm a ni. A tel hi tam lo mahila kan ram tan a pawimawh a ni, a ti.

Kum 2047 thlirin kawng tinrengah hma kan la a, Transform Mizoram Vision kan duang a. Tunah hian Mizoram mipui hi India mipui zaa 0.9 vel kan ni a, India GDP ah 0.1 % vel kan thawh ve a. Hei hi kum 2047 -ah chuan 1% nihtir kan tum a. Per Capita ang chuan kan 2047 target chu Rs. 16 lakh a ni.

Chu dinhmun kan thlen theih nan chuan a bulthut atangin hma kan la a. Kuthnathawktute tan thlai thar eng emaw zatah support price kan pe a, animal insurance leh crop insurance kan kalpui bawk a.

Bana Kaih CM Special Package hmangin eizawnna tenaua bultan duh leh an neihsa tilian duhte tan kawng kan hawng a. Tlema a lian tham deuha hma la duhte tan Loan Component kan nei bawk a. Bana Kaih thawhpuina hi Project tha neite tan chauh a hmuh theih thung a, induhsakna emaw thlei bik neia kalpui a ni lo. Chuvang chuan kan thlen chinah pawh kan lawm a, loan hmutute zingah loan rul tha lo tumah an la awm lo. Entrepreneur thate tan dinchhuah theihna kawngka kan hawng a, hetiang scheme tha hi hmun dangah hmuh tur a vang ngawtin kan ring a ni.

Thil thar ngaihtuah chhuah (Innovation) lamah hian tan kan lak a tul hle a. Innovation Facility Centre pawh kan nei a. Innovation Award te kan siam a, bultan thar turte tan Venture Capital Fund-te kan siam a, Mizoram Start Up Mission te kan nei bawk a.

MSME lamah pawh harhtharna a thleng mek a, kan thalai tam takten kan Agriculture Product-te hmangin food processing unit an din chho mek a, kuminah pawh kan Thei tharchhuah atang Fruit Beer siamchhuaktu tur mi eng emawzat chu permit kan pe a. MSME lamah chak takin ke kan pen mek.

Entrepreneur tam zawk kan neih zel theih nana sorkarin hma a laknate hi rawn zirchiang ula, a chhawr tangkaitu nih rawn tum ang che u.

Tin, mipuite pawhin kan ram thilsiamte hi kan ngaihhlut thiam a tul hle a. Mahni ram siam ngei hi lei nachang i hria ang u. Chu chuan thilsiamtute a chawikang dawn a ni. Sorkar pawhin The Mizoram Preferential Store Purchase Rule a siam tha a. Kan kutchhuakte hi a theih ang anga hman tangkai zel kan tum. A theih ang anga state pawn lama thehdarh pawh kan duh a. Delhi khawpuiah August thla khan Made by Mizo Dawr (Kiosk) kan hawng nghe nghe a ni.

Awlsam zawka kan entrepreneurs ten pawisa puk tur an hmuh zung zung theih nan kan puala bank neihte hi tha kan ti a. A zirchiangtu tur Committee kan din tawh a, a taka chantir thuai kan tum dawn a ni.

Kan za hian Team Mizoram kan ni a, kan hnathawh a inang lo deuh hlek thei a, kan awmna a hrang hlek thei a. Nimahsela, kan za hian Mizoram hmasawnna tura thawkho vek, mawhphurhna nei vek kan ni tih hi kan hre reng dawn nia, a ti.

Chief Minister hian Mizo Entrepreneur-te thilsiam chhuah (products) sawm (10) a tlangzarh a, summit puala innovation challenge an buatsaih lawmman a sem bawk.