Cooperation Minister Pu Pc Vanlalruata’n Hardware Distribution Programme Hmanpui
Vawiin khan Cooperation Minister Pu P.C.Vanlalruata chuan Computerisation of Primary Agricultural Credit Cooperative Societies (PACS) Phase-II hnuaia Centrally Sponsored Project kalpui mek Hardware Distribution Programme chu RCS Conference Hall, Babutlang-a neihah khuallian niin a hmanpui. He hunah hian Cooperation Department Commissioner & Secretary Pu Udit Prakash Rai chu khual zahawm a ni.
Minister chuan Cooperative Society-te tana hardware semna hun a hmanpui thei chu lawmawm a tih thu a sawi a. Cooperative Society-te pawimawhzia sawiin, ram hmasawnna tur atana pawimawh ber zinga mi an ni, a ti a. Khawvel hmasawn zelin a ken tel digitaization lama hma an sawnna tur kailawn pawimawh tak a nih avangin he an hardware dawnte pawh tangkai taka hmang turin a chah a. Mizoramin hmasawnna rahbi thar a chuankai theihna atana entawntlak (model) ni tura ke pen turin a fuih a ni.
Pu P.C. Vanlalruata chuan Society-te hmasawn zelna atan Chief Minister pawmpuina angin sawrkar laipui Ministry of Cooperation hnenah Mizoram Cooperative Policy an duan chu thehluh tawh a nih thu a sawi a. Cooperative Society-te chuan sawrkar atangin a tlem berah cheng nuai 1 tal puihna an dawn theihna tur scheme a, tiin, he dilna hi a hlawhtling a nih chuan Mizorama Cooperative Society-te tan a tangkai hle dawn a ni, a ti.
Khual zahawm Cooperation Department Commissioner & Secretary Pu Udit Prakash Rai chuan Mizorama Cooperative Society ten hardware an dawng thei chu hmasawnna nasa tak a ni a, PACS-te chu Mizoram hmasawnna atana laimu an ni, a ti. Mizoramah hian PACS 270 bawr vel an awm mek thu leh heng PACS 270 te zawng zawng hian computer an la neih vek theih nana thawh a inhuam thu a sawi a. Cooperative Society chu Mizoram than zelna tura fawng pawimawh tak vuantu a nih thu a sawi bawk a ni.
Computerisation of PACS Project hi Ministry of Cooperation hnuaia Centrally Sponsored Project kalpui mek niin Phase-II ah hian PACS 24 computerised tura thlanchhuah an ni a, field verification pawh tih zawh tawh a ni. Hardware semte hi sawrkar thuchhuah ding lai angin GeM Portal kaltlang veka supplier-te hnen atanga lei an ni a. Saaj Venture, Dimapur-te chu supplier niin vawiina hardware an sem hi item 10 – Desktop HP Pro Tower 280 G9, inverter, dot matrix passbook printer, HP laser printer, thermal printer, fingerprint scanner, barcode scanner, POS machine, webcam leh tablet te a ni a. Heng PACS computerized te hian ERP (Enterprise Resource Planning) software kaltlangin hna an thawk tawh dawn a ni.
Vawiin programme hi Cooperative Societies Registrar Pu John LT Sanga chuan Chairman niin a kaihruai a, Computerization of PACS Nodal Officer Pi L.Lalzidingi chuan report pein, PACS aiawha thusawi tawi Pu Lalnunsanga (Melriat MPACS) leh Pu Lalngaihawma (Chhuanthar MPACS) atangin ngaihthlak a ni a, Additional Registrar Pu A.N.Barbhuiya chuan lawmthu sawiin he programme hi a khar a ni.
