Union Minister of Fisheries, Animal Husbandry and Dairying hovin Hmarchhak State-ten Regional Review Meeting an nei
Vawiin khan Mizoram tlawha lo zin mek Union Minister of Fisheries, Animal Husbandry and Dairying Pu Rajiv Ranjan Singh alias Lalan Singh kaihhruaiin hmarchhak state pariat(8) – Arunachal Pradesh, Assam, Manipur, Meghalaya, Mizoram, Nagaland, Sikkim leh Tripura-te chuan High Court Hall, MINECO-ah hmarchhak state-te hmalakna leh sawrkar laipui hnuaia scheme hrang hrang hman tangkai dante thlir hona (Regional Review Meeting) an nei a. He hunah hian Minister of State of Fisheries, Animal Husbandry and Dairying(FAH&D)Pu George Kurian, hmarchhak state tin atangin Fisheries, Animal Husbandry and Dairying changtu Minister-te, FAH&D Joint Secretary Pu Sagar Mehra, National Dairy Development Board(NDDB) Chairman Pu Meenesh Shah te bakah Central leh State official dangte an tel bawk a ni.
Mizoram sawrkar hnenah vawiin hun an lo buatsaih leh an lo dawnsawn avangin lawmthu sawiin, Minister Pu Rajiv Ranjan Singh chuan sawrkar laipui chuan hmarchhak state-te mawina leh nihphung hrang hrangte phochhuah a duh thu sawiin Mizoram mawina inthup mawi tak mai a hmu chhuak chu nuam a tih thu a sawi bawk. Minister chuan PM Modi-a’n hmarchhak bial hmasawnna tura vision a neih chu tarlangin, Central Sawrkar chuan chu vision puitlin a nih theih nan a theih apiang tih a duh thu a sawi a. Sangha khawi, Ran vulh leh Bawnghnute thar lama hmasawnna hian hmarchhak bialah economic development tha tak a thlen theih thu sawiin, Minister chuan he sector hian mimal hmasawnna chauh ni lovin, bial pum hmasawnna a thlen dawn a ni, a ti.
Sangha khawi bik chungchangah thu sawiin, Minister chuan PM Modi-a kaihhruaina hnuaiah Blue Revolution, Fisheries and Aquaculture Infrastructure Development Fund (FIDF), PM-Matsya Sampada Yojana(PM-MSY) leh hmalakna dang tam tak a awm thu a tarlang a. Heng hmalaknate avangin hmarchhak biala sangha thar chhuah chu kum 2014-a tonne nuai 3.78 thin kha kum 2025-ah chuan tonne nuai 7.05-ah a kaichhoh thu a sawi a ni.
