Serchhip-Ah ‘Kisan Mela & Exhibition – 2026’ Neih A Ni
Vawiin khan Serchhip Bazar Rooftop-ah Agricultural Technology Management Agency (ATMA) bultumin, ni hnih awh tur ‘Kisan Mela & Exhibition – 2026’ hawnna hun buatsaih a ni. Hawnna inkhawm hi ATMA Project Director Pi Lalchhuansangi’n a kaihruai a, Serchhip District Bawrhsap Pu Paul L. Khuma’n khuallian niin Mela hi a hawng a ni.
Khuallian Pu Paul L. Khuma chuan Kisan Mela neih a nih theih nana ATMA hmalakna chu fakawm a tih thu sawiin, he huna kalkhawm loneitute chu tunlai thiamna (modern technology) hmang tangkai deuh deuh tur leh mi thiamte rawn nachangte hria a, an zir chianna atanga thil tha zawk an sawite chu thuawih taka zawm thin turin a chah a. Agriculture chu mihring nunphung (quality of life) innghahna lungphum pawimawh em em, mimal leh khawtlang hriselna innghahna bulpui a nih thu sawiin, loneitute chuan thlai hrisel tak an thar theih nan rilru dik tak pua an hnate thawk thin tura chahin, he Kisan Mela hi lo hlawkpui theuh turin duhsakna a hlan a. He hun hmanga kalkhawm department hrang hrang hotute leh khawtlang hruaitute pawh, thawh hona tha tak nei zel tur leh mahni hma chauh sial mai lova, mipuite leh mamawhtu apiangte tana thahnemngai taka thawk thin turin a fuih bawk.
Kisan Mela-ah hian Department hrang hrang 8 – Agriculture, Horticulture, Fisheries, Sericulture, AH & Vety, LRS & WC (Soil), KVK leh ATMA-te bakah entrepreneurs-te tan stall 24 zet siam a ni a. Hmasawnna thar an neihte leh thil siam leh thar chhuah chi hrang hrangte pho chhuah niin, a thlawna inentirna ‘Animal Health Clinic’ leh ‘Plant Health Clinic’ te buatsaih a ni bawk. FPO leh MzSRLM hnuaia SHG hrang hrangte bakah agri-input dealers-te an tel tha hle a, hei hian ATMA thil tum ber ‘Research-Extension-Farmer’ inthlunzawmna ti chakin, loneitu leh entrepreneur-te tan thiamna thar leh eizawnna kawng thar a hawn belh zel beisei a ni.
