Mizoram Larsap hovin Bihar, Rajasthan, Odisha leh Himachal Pradesh-te dinchamphaphak lawm
Vawiin khan ‘Ek Bharat Shreshtha Bharat’ hmalakna hnuaiah Mizoram Larsap, General (Dr) Vijay Kumar Singh, PVSM, AVSM, YSM (Retd) hovin Bihar, Rajasthan, Odisha leh Himachal Pradesh-te state dinchamphaphak lawmna Durbar Hall, Lok Bhavan, Aizawlah neih a ni.
Larsap General (Dr) Vijay Kumar Singh chuan state danglam bik leh pawimawh tak tak pali Bihar, Rajasthan, Odisha leh Himachal Pradesh-te dinchamphaphak lawmna buatsaih a ni chu lawmawm a tih thu sawiin hemi pual hian duhsakna a hlan a. Heng state-te chanchin langsar leh chhuanawm tak takte tarlangin, “State tinte hian danglam bikna an nei theuh a, thatna riau an neih mai bakah theihna nasa tak an neih avangin hmasawnna nasa takin heng state-ahte hian a thleng a ni,” a ti a. Larsap chuan Ek Bharat Shreshtha Bharat hmalakna fakawm a tih thu sawiin, “State/UT-te dinchamphaphak kan inlawm sak tawn thin hmang hian midangte hnam ziarang, nunphung leh tih dante kan hriat thuk lehzual phah a, hei hian inpumkhatna siamin India chu ram danglam bik a nih zia a lantir a ni,” a ti a. Danglamna nasa tak kara kan inpumkhat tlatna chu kum 2047-a ram changkang leh intodelh, “Viksit Bharat” a India siam tura hmanraw pawimawh tak a nih thu a sawi a. Programme hlawhtlin theih nana tha thawhtu zawng zawngte chhuanawm a tih thu a sawi bawk.
He hun hi Pi Lalhruaitluangi, Addl. PS to Governor chuan kaihruaiin programme buatsaih chhan a sawifiah a. Bihar Larsap Lt. Gen. (Retd) Syed Ata Hasnain, Rajasthan Larsap Shri Haribhau Kisanrao Bagde, Odisha Larsap Dr. Hari Babu Kambhampati leh Himachal Pradesh Larsap Shri Kavinder Gupta te thuchah bakah state palite chanchin tarlanna video tawi thlir ho a ni a. Dr. Saurav Suman (Bihar), Asst. Professor, NIT Mizoram, Dr. Nidhi Yadav (Rajasthan), Asst. Professor, NIT Mizoram, Prof. Pravakar Rath (Odisha), Pro Vice Chancellor, MZU leh College of Veterinary Sciences & Animal Husbandry, Mizorama zirlai Sonali (Himachal Pradesh) te’n an state chanchin tawi an tarlang a. Mizoram University, NIT Mizoram leh Govt. Mizoram Law College zirlaite’n hnam lam leh zai mawi tak takte an entir bawk a. Hemi hnu hian Larsap hian hemi puala kalkhawmte hi Upper Lawn, Lok Bhavan-ah kawmin hun hlimawm tak an hmang ho a ni.
March ni 22, 1912 khan Bengal Presidency atangin Bihar a lo piang a. Rajasthan hi March ni 30, 1949 khan Jodhpur, Jaipur, Bikaner leh Jaisalmer lal ramte inzawmkhawm chuan siamin Greater Rajasthan ti a vuah a ni a. Odisha hi tunhma chuan Bihar hnuaiah awmin, April ni 1, 1936 khan state puitlinga hlankai a ni a, tawng hman behchhana India rama state piang hmasa ber a ni. April ni 15, 1948 khan Himachal Pradesh hi Indian Union hnuaia Part C State ni turin a lo piang a. January ni 25, 1971 ah state puitlinga hlankai a ni.
Ek Bharat Shreshtha Bharat programme hian India rama State leh UT hrang hranga cheng hnam hrang hrang, hnam ziarang leh nunphung inang lo tak takte inkarah inpawhna leh inunauna tha zawk hnam ziarang inhriatpawh tawnna kaltlangin siam a tum a ni.
