Minister Prof. Lalnilawma,n Mizo Khawbungah Hlakungpui Mual Thawhrukna Leh Ruby Jubilee Hmanpui
Prof. Lalnilawma, Minister of State chuan vawiin khan Mizo Hlakungpui Mual thawh rukna leh Ruby Jubilee chu Khuallian niin a hmanpui a, hemi rual hian hla phuahthiam mi pahnih leh thuziakmi pali chawimawina lungphun a hawng nghal a ni. He hunah hian East Tuipui bialtu MLA Pu Ramthanmawia chu khual zahawm a ni.
Prof. Lalnilawma chuan thu sawiin, Mizo Hlakungpui Mual buatsaih a nih theihna tura ngaihtuahna sengtute fakawm a tih thu sawiin mi nazawng tih theih a nih loh thu a sawi a, Mizo Hlakungpui Muala seng luh thar mi 6 te chu a lawmpui thu leh zahna chibai a buk thu a sawi a, mi hlawhtlingte lawmpui a, chawimawi tlakte chawimawi zel turin kalkhawm mipuite a sawm a ni.
Khuallian chuan Mizo hlakungpui mual hi hmun hrang hranga Mizo awmte min phuarkhawmtu ni se a duh thu a sawi a, Hlakungpui mual atang hian Mizo te harh thar a, zirna ngaisang thar tur leh thalaite’n tlawmngaihna leh hawihhawmna nun vawng nung turin a chah a, Mizo Hlakungpui Mual hi Mizote hlut a nih zel a, Mizo History zir a nih apianga thai lan a nih zel theihna turin a duhsak thu a sawi a, lawmpuina Cheng sing nga (₹50,000) a hlan nghal a ni.
Khual zahawm Pu Ramthanmawia chuan Mizoram hmun hrang hrang atanga pankhawm a nih hian Mizo Hlakungpui Mual hlutna a lantir thu a sawi a, sum leh thil hlu danga lei theih loh a nih thu pawh sawiin thangthar lo kal leh zel turah pawh a hlutna a pun deuh deuh a beisei thu a sawi a. Mizote tana hmun pawimawh tak buatsaihtu Committee te leh Khawbung khua te chungah lawmthu a sawi a, Mizo Hlakungpui mual din alo nih dan hrang hrang tarlangin, kum 40 lai a lo tling ta chu lawmawm a tih thu a sawi bawk.
He hun hi Mizo Hlakungpui Mualah hman niin Pu C. Lalluia, Chairman, Mizo Hlakungpui Mual Committee chuan a kaihruai a, Rev. Dr. C. Rosiama, Mission Veng Aizawl chuan hunserh hmangin Khawbung Branch YMA zaipawl an zai a, Secretary te hnen atangin report ngaihthlak niin Pi Lalchhandami Pachuau, BDO Khawbung bakah sengluh thar chhungte leh sengluh tawh chhungte atangin thusawi ngaihthlak a ni a, anni bakah hian Pu B. Lalthangliana, Chairman, Selection Committee leh Pu H. Lalniliana, VCP leh Vice Chairman Mizo Hlakungpui Mual Committee te’n thu an sawi bawk. Zanah Mizo Hlakungpui Mual kum 40-na pualin Concert buatsaih a ni bawk.
Mizo hlakungpui mual thawhruknaah hian hla phuahtu pahnih – Pu Hawva (1893-1956) leh Pu Lalmama (1901-1959) te bakah thu ziaktu pali – Capt. LZ Sailo (1924-2008), Pi Kawlkungi (1927-2015), Rev. Zairema (1917-2008) leh Pu Lalhmingliana Saiawi (1937-2016) te sengluh an ni a, mi 41 sengluh an ni tawh a ni.
