AMC inthlan lo awm turah candidate inhnuhdawh hun a tawp dawn
Aizawl Municipal Corporation (AMC) ward 19 inthlanna lo awm tur atana candidate-te inhnuhdawh theih hun hnuhnung ber chu vawiin chawhnu dar 3 a ni.
AMC inthlan buaipuitu State Election Commission chuan inthlan vote thlak ni atan April ni 21 a ruat a, vote tlate hi April ni 27-ah chhiar a ni a. State Election Commissioner Dr. H. Lalthlangliana chuan kar kalta Zirtawpni khan AMC inthlanna lo awm tur chuh tura hming pelut mi 68-te nomination endik a nih thu a sawi a. Candidate 68-te hian endikna an paltlang vek a ni. AMC inthlan lo awm tur hi rorel lai ZPM, MNF leh MPCC te chuan bial 19 an chuh kim vek a. BJP chuan bial 11-ah candidate an nei a. Independent candidate an awm lo. AMC bial/ward 19 zinga 6 chu hmeichhe tan chauha chuh theih tura ruat a ni a. He tih lai hian tu pawhin a chuh theih bialah hmeichhe candidate 7 an awm a ni.
AMC inthlan lo awm turah hian vote nei hmeichhia nuai 1, sing 2, sang 8 leh 470 leh mipa nuai 1, sang 9 leh 376 awmin vote nei zawng zawng hi mi nuai 2, sing 3, sang 7 leh 846 an ni a. Polling station 257 awmin a tul anga auxiliary polling station siam belh a ni ang. Inthlanna atan hian Bharat Electronics Limited (BEL) siam electronic voting machine (EVM) hman a ni dawn a ni.
