DCSO Siaha-In Hrilhlawk Lohin Mizofed Gas Agency Leh Filling Station-Te A Tlawh
Vawiin khân Pu M. Vanlalduata, DCSO, Siaha district chuan hrilhlawk lovin Siaha khawpui chhung eirawngbawlna gas-a chawmtu (agent) Mizofed Gas Agency, Meisatla-a tlawh a, Mizofed Manager Pu Joseph Lallungmuana leh a thawhpui te’n an lo dawngsawng a ni.
Pu M. Vanlalduata chuan tunlai khawvel boruak inlumletin ni tin eirawngbawlna gas lakluh leh semchhuahah Siaha khawpui chhung nghawng a nei em tih hrechiang tura tlawh a nih thu a sawi. Pu Joseph Lallungmuana chuan tun dinhmunah eirawngbawlna gas a thlen ṭhat thu leh kawnga thang mêk a awm thu sawiin, tunlai hmasawnnain a ken tel social media hian chiaina thlen lo se chuan mipui te’n eirawngbawlna gas hi sem dan phung pangngaiin kan sem chhuak reng a, chutiang tur chuan stock dinhmun a ṭha a ni tih an hria ang a ti. Siaha khawpui chhungah home delivery an kalpui tawh thu Manager hian sawiin, thu lêngvak a tam hma kha chuan eirawngbawlna gas la tûrin kan intur zawk mah hial a ni a ti.
Tun hnaia mipui harsatna tawh bêr chu Delivery Authentication Code (DAC) ah anih thu Pu Joseph Lallungmuana chuan sawiin, miscall na turah va call hnuah sms lo thleng tur hi lo thlen theih loh châng a tam, DAC tel lo chuan gas pekchhuah theih a ni lo va, thingtlanga chengte tán gas lâk theih hun inkar ni 45 leh khawpui chhunga chengte tán ni 25 a ni. Gas card neitu (holder) mobile number ngei aṭang chauha gas hi book/miscall theih anih thu mipuiin an hriat thar leh ṭhaa a hriat thu Manager hian a sawi bawk.
