Khawzawlah Digital Literacy leh Cyber Security chungchang zirtirna buatsaih
Vawiin khan District Child Protection Unit, Superintendent of Police Office, Khawzawl leh Presbyterian English School, Vengthar Pastorate tangkawp te chuan sikul naupang nu leh pa te tan “Awareness Programme for Parents of Children on Digital Literacy and Cyber Security in accordance with the guidelines of Traning of Parents of Children on Digital Literacy & Cyber Security as part of the Protection of Children from Sexual Offences Act, 2012 and the Prohibition of Child Marriage Act, 2006” tih thupui hmangin Vengthar YMA Hall, Khawzawl ah programme an huaihawt a.
He programme-ah hian Pu James Lalthangmawia, District Child Protection Officer, Khawzawl chuan kum tlinglova nupui pasal neih a pawi dan te, danin a phalloh dan leh hrem theih an nih dan te, lo ti lui leh lo huaihawt lui tute chu mimal, pawl leh kohhran te hnenah pawh na taka Prohibition of Child Marriage Act (PCMA) dan anga hrem theih an nih dan te kalkhawmte hnenah zirtirna a pe a. Mizoram dinhmun te sawiin kum tlinglova nupui pasal nei an la awm thin thu a sawi a, Khawzawl district tun dinhmunah Mizorama dan zawm tha ber an nih thu a sawi bawk.
Pi C.Lalhmingsangi, Protection Officer(IC) chuan POCSO Act 2012 dan chungchang leh nu leh pa in naupang venhim chungchangah fimkhur a ngaihzia zirtirna a pe a. POCSO dan hnuaiah hian hremna a nat em avangin Nu leh Pa te hmeichhiat mipat kawngah kan fate kan ven fimkhur a ngaih zia a sawi bawk a, tun dinhmunah kum thum chhung lekin Khawzawl district ah POCSO case 27 lai register a nih tawh thu a sawi bawk.
Pu Zosangliana, Addl. SP chuan Digital Literacy & Cyber Security chungchang zirtirna pein tunlaiah phone leh social media kaltlanga inbumna leh invaukhanna a tamzia thu te, sum tam tak mi chhungkua in an chan thin thu te leh naupangin nu leh pa te hriat lova phone kaltlanga bank account an khawih awlsam zia leh fimkhur a tulzia te mipui kalkhawmte zirtirna a pe bawk. Naupangin phone an khawih nasat hian zirna lamah an tlakchhiat phah mai bakah naupang nunah nghawng nasa zawk a thlen theih thu te a sawi.He awareness campaign hi India ram pum huapa hmeichhe naupang te dawmkanna leh damkhawchhuah theihna tura duan Beti Bachao Beti Badhao scheme hnuaia mi niin, Khawzawl District-ah sikul hrang hranga nu leh pa te hnena zirtirna pek tura duan a ni.
