Lunglei District Bawrhsapin Lungsen BDO Office, PHC, Health ATM leh Cosmic Class te a tlawh
Lunglei District Bawrhsap Pi Navneet Mann chuan vawiin khan Lungsena Block Development Office, Primary Health Centre (PHC), Health ATM leh Cosmic Class te tlawhin, Aspirational Block Programme (ABP) hnuaia Phairuangkai Secondary School (RMSA) leh Phairuangkai Health & Wellness Centre thawm ṭhat hna thawh mekte a enfiah.
Bawrhsap hi Additional Deputy Commissioner Pi Zoramdini leh District Information & Public Relations Officer Pu C. Lalhruaitluanga te’n ṭawiawmin, Lungsen Block Development Officer (BDO) Pu Lalhruailiana Zote leh thawktute’n an lo dawngsawng a. BDO Office leh Lungsena DC Rest House thawm ṭhat hna thawk mek chu enfiahin, National Highway-302 laih mekin a pal tlang ram neitute nen an inkawm bawk.Bawrhsap hian Lungsen Secondary School (Samagra)-a vansang chanchin zirna hmun, Cosmic Classroom (Astronomy Lab) chu tlawhin, a enfiah a. Zirtirtute nen Astronomy Lab kalpui dan leh Lungsena zirlaite’n ṭangkai zawka Astronomy Lab an hman theih dan tur an sawi ho.
Bawrhsap hian Lungsen PHC pawh tlawhin, Lungsen PHC-a Health ATM chu a enfiah bawk a. Lunglei Deputy Chief Medical Officer Dr Christina Zonunmawii leh PHC-a thawktute’n lo dawngsawngin, PHC dinhmun leh Health ATM dinhmun an lo hrilhfiah a. Lungsen Block chhunga hriselna lama hmasawnna atana thil pawimawh hrang hrang te, mipuite’n ṭangkai zawka Health ATM an hman theih dan tur te an sawi ho bawk.
Lunglei Bawrhsap hian Lungsen Aspirational Block tihhmasawnna atana Aspirational Block Programme hnuaia sikul, damdawi in leh anganwadi centre thuam ṭhat hna thawh mek dan enfiah nghalin, he hma lakna hnuaia Lungsen BDO enkawlnaa thawm ṭhat mek Phairuangkai Secondary School (RMSA) leh Phairuangkai Health & Wellness Centre te chu a hmunah tlawhin a enfiah bawk.
