P&E Minister Pu F. Rodingliana’n Lungleia Sazaikawn Sub-Station, Kawmzawl Sub-Station leh IIDC Pukpui te a tlawh
Lunglei West bialtu MLA Pu T. Lalhlimpuia ngen angin Mizoram sawrkara Power & Electricity (P&E) Department Minister Pu F. Rodingliana chuan tukin khan Lunglei Saizaikawn Sub-Station chu a hmunah a tlawh a. Hauruang, Vanhne tlang dung, Vaisam leh Lunglei West huam chhung vengte chawmtu Sazaikawn Sub-Station harsatna chu a hmunah enin, bialtu MLA leh P&E hotute nen Sub-Station leh eng pek chhuahna tihchangtlunna tur ruahmanna an sawi ho.
He hunah hian Sazaikawn Sub-Station-in a chawm khua leh vengte’n eng dawn chungchanga harsatna an tawh te, line leh khawl mamawh leh tihchangtlun ṭulna te sawi ho a ni a. He’ng harsatna phuhrukna tur leh tiziaawm tura department aṭanga ruahmanna awm sate leh ṭha zawka hma lak a nih theih dan tur te sawi ho a ni.P&E Minister-in Sazaikawn Sub-station a tlawhnaah hian Lunglei West bialtu MLA Pu T. Lalhlimpuia, Lunglei Municipal Council (LMC) Vice Chairman Pu K. Lalrinawma, Ward No. 5 Councilor Pi Zonunmawii, P&E hotute leh thawktute, Rahsiveng leh Sazaikawn Local Council leh YMA hruaitute leh party hruaitute’n an ṭawiawm.
P&E Minister hian Kawmzawl Sub-Station pawh tlawhin, a dinhmun a enfiah a. Commerce & Industries Department hnuaia Pukpuia Integrated Infrastructure Development Centre (IIDC)-in kawlphetha a mamawh phuhruk tura transformer dah belh dan tur leh eng pekna atana thil ṭul hrang hrang a enfiah bawk.
