Khawzawlah African Swine Fever (ASF) leng mek chungchang sawihona neih a ni
Vawiin khan DC Chamber Khawzawl-ah Khawzawl Town Area huamchhunga African Swine Fever (ASF) leng mek chungchang sawihona hun neih a ni a, Khawzawl Bawrhsap, Pu K. Vanlalthiana’n a kaihruai. He hunah hian Khawzawl Bawrhsap, Pu K. Vanlalthiana chuan rin loh tak maia ASF a rawn leng leh chu pawi a tih thu sawiin, VC te chu an theih ang tawka fimkhur tura mipui te hrilhhre turin a chah a. Mizoram Sawrkarin kum 2024 a ASF chu State Specific Disaster-a a lo puan tawh angin Khawzawl District huamchhungah kum 2024 chhunga vawk thi tanpuina dilsak te zingah chhungkaw 205 hnenah sumfai belhkhawm ₹1,56,800 pek a nih tawh thu sawiin, pawisa dawn belh a nih veleh chhungkaw sem bang 5 te hnenah pek leh a nih tur thu a sawi.
District Animal Husbandry & Veterinary Officer Dr. Ruby Ngurnunmawii chuan ASF chungchanga Khawsawl District report pein, Infected Area puan a ngaihna lai hmun turte, a nghawng tur leh harsatna awm thei te a sawifiah nghal a. Tun dinhmunah Khawzawl DVO in Test Kit duh anga tam an neih loh avanga Test rang taka tih a harsat thu leh an theih ang anga hma an lak mek thu a sawi tel bawk a. Vawk thi neite zingah Registration ti lo an tam thu leh VC te chu Vawk nei zawng zawngte Registration ti tura lo hriattir turin a chah bawk. Dr. Phillip Lawmsangzuala, Veterinary Officer chuan ASF chungchang inkaihhruaina (Standard Operating Procedure) chi hrang hrang te sawifiahna neiin, zawhna leh chhanna hun hman a ni bawk.
Bawrhsap chuan VC te chu harsatna an neih chuan a tul anga an buaipui zui zel tur thu leh thawhhona tha neih a pawimawh thu sawiin meeting hi a khar a ni. He hunah hian Pu. Suvigya S Chandra, SDO (Sadar), Pu Paul Rokima, SDC, Pu Lalrinhlua, SDC, Pu C. Pazawna, Joint VCP te leh veng tin aiawh VC te an tel a ni.
