Agriculture Minister Pu PC Vanlalruata’n tun hnai ruahsurin chhiatna nasa tak a thlenna Serchhip Mat phai Zawlpui a tlawh
Agriculture Minister Pu PC Vanlalruata, Tuikum bialtu MLA ni bawk chuan vawiin khan Serchhip Zawlpui Zaua tun hnai ruahsurin chhiatna nasa tak thleng chu a hmunah a tlawh a. Loneituten harsatna an tawh dan te Minister hnenah hian an sawi a, an mamawh te an thlen a ni. Agriculture Minister Pu PC Vanlalruata chuan ruahsur nasa avanga loneitute tawrhna a tawrhpui thu leh theihtawp chhuaha sawrkarin an tana hma a lak tur thu a sawi a. Zawlpui leilet mai bakah Serchhip khawpui chhunga chhiatna thlen nasatzia a takin a hmu a, Mizoramah pawh a tuar nasa ber an ni tih sawiin pawi a tihzia leh ngai an awh leh theih nan sawrkarin theihtawp a chhuah tur thu a sawi a.
NHIDCL te kawng siamin a nghawng, Serchhipa tunhmaa la thleng ngai lo, Zawlpui leilet hmunhma heti taka tuilianin a ti chhe ta mai chu pawi a tihzia sawiin hmasawnna ruhrel din a nih rual a, environment ngaih pawimawh tel a tulzia te, fimkhur a tulzia te a tilang chiang hle a ni, a ti. Zawlpui zauah hian tun tum ruah sur nasa khan leilet tam tak tichhiain tui lakna a tichhe hneh hle a. Zawlpui panna kawng pawimawh Tuichar lei chu a bung a, Tuichar lui luanna a insawn a. Leilet neitu ten tui an lakna luite luanna hmun insawn leh lei dang chhia a awm bawk a ni. Zawlpui leilet neitute chuan Tuichar lei siam that thuai an mamawh thu leh an tui lakna siam that an mamawh zia minister hnenah hian an thlen a ni.
Minister hian Zawlpui a tlawh zawh hian Serchhip DC Office ah Serchhip DC Pu Paul L Khuma hoin thutkhawm hun tawi hman zui nghal a ni a. Serchhipa chhiatna hrang hrang thleng te leh farmer te mamawh te Minister hian a sawi pui a. Hei bakah hian Sawrkar flagship programme Banakaih hnuaia sawhthing hralh chungchanga an dinhmunte enpuiin DAMC hmalakna te an sawi dun nghal a ni.Pu PC Vanlalruata hian a bial Tlungvel, Chhingchhip, Baktawng, Chhiahtlang te tlawhin khawtlang hruaitute nena inkawmhona hun an hmang a. Tlai lamah Serchhip District chhuahsanin Aizawl a pan a ni. Vawiin hian Agriculture Minister hi DAO Pu Lalchharliana, DIPRO Pi Lalnunmawii bakah official dangten an tawiawm a ni.
