Lunglei DC hma lakna, “I Kawtkaiah Sawrkar” chu khaw 6-ah buatsaih niin, mi 5,082-in an chhawr
Lunglei District Deputy Commissioner Office hma laknaa mipuite’n sawrkar hma lakna hrang hrangte an chhawr ṭangkai theih nan an khuaa kal chilha service hrang hrang chhawp chhuahsakna, “I Kawtkaiah Sawrkar” (Prashasan Gaon Ki Ore) chu January ni 14, 2025 leh May ni 14, 2025 inkar chhung khan Lunglei District chhunga khaw paruk – Haulawng, Ralvawng, Bunghmun, Tlabung, Lungsen leh Bualte-ah te buatsaih niin, sawrkar department hrang hrangte’n mipui service an chhawp chhuah chu he’ng khua leh a chhehvela mi 5,082 te’n an chhawr ṭangkai a ni.
“I Kawtkaiah Sawrkar” hi Lunglei District thingtlang khaw hla leh kilkhawr zawka mite’n khawpui pan kher ngai lo va, an kawtkaiah awlsam taka sawrkar department hrang hrang an dawr theihna tur te, sawrkarin an tana ruahmanna leh hamṭhatna a siam an hriat chian theihna tur leh an harsatna leh mamawh hrang hrang chin felna remchang an neih theihna atana ruahman a ni a. January ni 14, 2025 khan District Bawrhsap Pi Navneet Mann hovin Haulawngah bul ṭan niin, khaw hrang hranga hun buatsaihah sawrkar department hrang hrangte chu mipuite tan an pen chhuak a. Mipui mamawh service hrang hrang chhawp chhuahte chu District mipuite’n an hlut hle a ni.
Lunglei District-a “I Kawtkaiah Sawrkar” hun buatsaihahte hian Deputy Commissioner office hnuaiah Aadhaar siam thar leh siam ṭhat 487, Voter ID siam thar leh siam ṭhat 428 leh certificate hrang hrang (tribal/residential/income, etc.) pek chhuah 611 a awm a. Supply department kal tlangin ration card siam thar leh siam ṭhat 639, Health department hnuaia a thlawna inentir leh ABHA Card siam 498, Vety hnuaia ran entir leh hri danna pek 890, Agriculture leh Horticulture hnuaia thlai leh thei chi sem leh scheme hrang hranga inziak lut 500 an awm bakah, SBI leh MRB hnuaiah bank account hawng thar leh scheme hranga inziak lut mi eng emaw zat awmin, Social Welfare, Women & Child Development, Commerce & Industries, Education, P&ED, PHED, PWD, RD, Soil, Irrigation, Forest, Police, Fire & Emergency, Taxation, Revenue leh department hrang hrangte’n sawrkar scheme hrang hrang hnuaia inziah luhna leh mipui harsatna chin felna an buatsaih bawk a. A pum puiah mi 5,082-in he’ng service-te hi an chhawr an ni.
