School Education Department Minister leh MSCPCR hotute inkawm
School Education Minister Dr Vanlalthlana chu vawiin khan Mizoram State Commission for Protection of Child Rights (MSCPCR) hotute nen a pisa-ah an inkawm. He meeting-ah hian zirlaite himna leh an chanvo humhalh kawnga Right to Education Act, 2009-in thuneihna MSCPCR a pek anga hmalakna hrang hrang an neih mekte leh School Education Department-in a thlawp dan turte sawi ho a ni.
Minister Dr Vanlalthlana chuan MSCPCR-in school leh hostel-te en dik hna an thawh țhin leh naupangte himna atana POCSO Act chungchang zirtirna (awareness) an kalpui țhinte chu zirlaite tan a pawimawh hle tih a sawi a. Minister chuan MSCPCR-in school hostel leh canteen-a ei leh in hrisel lo chungchangah te leh zirlai naupangte himna an en dik țhin chu School Education Department chuan a thlawp tlat a ni, a ti. MSCPCR chuan an hmalaknate chhunzawm zel se, Minister chuan a ti a; an hmalakna chuan zirlai naupangte tan Zirna In him zawk leh nuam zawk a siam ngei a beisei thu a sawi.
He inkawmnaah hian zirlaite rilru leh taksa hriselna bakah sikula naupangte himna (safety protocol) pawimawhna sawi ho a ni bawk a. MSCPCR hmalakna hi School Education guidelines leh National Education Policy 2020 nen a inmil avangin School Education Department leh MSCPCR chu chak zawka thawh dun zel an tum a ni.
