LMC hotute’n thu thar theh darhtute hmaah Traffic leh Parking chungchanga an hma lak dan tur an puang
Vawiin khan Lunglei Municipal Council (LMC) hotute chuan LMC Board of Councillors (BoC) Meeting Hall-ah thu thar theh darhtute kawmin, Lunglei khawpui chhunga lirthei chet vel dan leh hun dan, Traffic leh Vehicle Parking chungchanga an hma lak dan tur an puang a. LMC-in lirthei hun man (parking fee) an khawn chhuahte chu phal lohna hmuna lirthei hung leh riahte vil vengtu tur Traffic Warden rawihna atan leh khawpui chhunga thirhrui (cable) inthlung hnawk chin felna atan hman a ni dawn tih an sawi.LMC Chairman Pu Lalzuithanga’n hun kaihruaiin, LMC-in Lunglei khawpui chhunga lirthei hunna felfai leh mipui tana himna kawngah ruahmanna a siam ṭhin thu leh lirthei dahna (garage) nei lote chu garage siam nan September ni 30, 2026 thleng hun an pek thu a sawi a. Local Council te nena thawh hona tur inremna an siam chu a lo tawp tak avangin hma lakna thar an ruahman thu sawiin, mipui harsatna hre thiam chungin ruahmanna an siam tih a sawi.
Traffic Management leh Parking lam enkawltu, LMC Vice Chairman Pu K. Lalrinawma’n an hma lakna leh hmachhawpte a sawi a. Lungleia parking fee khawn chhuah tawh dan tar langin, kum 2023–2024-ah District Transport Officer enkawlna hnuaiah parking fee ₹2,99,944/- khawn chhuah a nih thu sawiin, kum 2024–2025-ah LMC-in khawn ṭanin, cheng nuai 13.45 (₹13,45,255/-) an khawn chhuak tih a sawi a. Kum 2025–2026-ah cheng nuai 14.98 (₹14,97,925/-) khawn chhuakin, kum kal mek, 2026–2027 June thla thlengin cheng nuai 8.53 (₹8,53,464/-) khawn chhuah a nih tawh thu a sawi a. Parking fee tling khawm zawng zawng chu LMC BoC-in a rel angin a bo a bang awm lovin mipui tan hman chhunzawm zel a nih thu a sawi.LMC Vice Chairman chuan parking fee tling khawm hmanna tur ruahmanna an siamte tar langin, veng chhung kawng (internal road) sir leh phal lohna hmuna lirthei hungte vil veng turin Traffic Warden rawih an ni dawn tih a sawi a. Lunglei SP kaihhruaina hnuaiah training pek an nih thu sawiin, August thla aṭang chuan an thawh ṭan theih an beisei thu a sawi.
Pu K. Lalrinawma chuan Lunglei khawpuia thirhrui (cable) inthlung hnawkte then faina atan parking fee an khawn khawmte chu hman a ni dawn tih sawiin, hemi kawnga hma lakna tur hi Traffic and Transport Co-ordination Committee-in ruahmanna a siam dawn tih a sawi.LMC thuneitute chuan Lunglei chu khawpui nuam, mihring himna khawpuia siam turin LMC hma laknate thlawp turin mipuite an sawm a. LMC thuneitute pawh a ṭulnaah fin chhuah ṭhin turin mipuite an ngen.LMC Chairman Pu Lalzuithanga leh Vice Chairman Pu K. Lalrinawma te hi Executive Councillor pahnih, Pu Zorinsanga Hmar leh Pi Lalhruaitluangi Sailo te bakah, Chief Executive Officer Pu Lalhmansanga te’n an ṭawiawm a ni.
