Saitual District AIDS Prevention And Control Committee Thu khawm
Vawiin khan DC Conference Room, Saitualah District Bawrhsap Pu Srinivas Sadi kaihhruaiin District AIDS Prevention Control Committee chu District Level Red Ribbon Quiz Competition neih dan tur leh Suraksha Action Plan chungchanga hmalak zel dan tur relin an thu khawm.
He hunah hian District Bawrhsap Pu Srinivas Sadi chuan Red Ribbon Quiz Competition buatsaih a ni thei tur chu lawmawm a tih thu sawiin, hmasawnna a thlen ngei a beisei thu a sawi a, chumi atan chuan theih tawp chhuah turin kalkhawmte a sawm nghal a ni.
Vawiin thutkhawmah hian Red Ribbon Quiz hi Saitual District chhunga Class VIII, Class IX leh Class XI zirlaite tan buatsaih ni se tih rel a ni a, Saitual District chhunga khaw hrang hrangah te, July ni 15 ral hmain Quiz Competition-a tel thei tur thlanna hi neih ni se tih a ni a, DEO Office-lamin mawhphurin an bawhzui ang. July ni 17-ah Deputy Commissioner hova thlir nawn leh ni se tih rel a ni bawk a ni. District Level-a inel tur school sawm (10) thlan chhuahte chu July ni 27-29 chhungin Govt Saitual College ah Quiz Competition chu neih tura rel a ni.
Heng bakah hian Dr Zothanpari Chhakchhuak, Member Secretary, DAPCC & Dy. CMO chuan Suraksha chungchanga hmalak tawhnate PPT hmangin sawifiahna a nei a, hmalak zel dan turte sawiho zui a ni bawk.
