Rashtriya poshan maah (national nutrition month) 2025 pualin ecce day hman a ni
Rashtriya Poshan Maah (National Nutrition Month) 2025 hmanna kal zelah vawiin khan District Programme Officer, Women & Child Development leh Child Development Project Officer, Aibawk ICDS Project buatsaihin Falkawn Anganwadi Centre-II-ah nu leh pate tan Early Childhood Care and Education (ECCE) chungchang inzirtirna hun hman a ni.
He huna thusawitu, khuallian Pi Zoramthangi Chhangte, Director, Women & Child Development chuan Mizo nu leh pate’n formal school-a naupangte an luhtir hma lutuk thin chu a ngaihmawhawm a, an tu leh fate chu thiamna pawimawh hmasa, an thluak mil tawka an zirtir thin a pawimawh thu te, naupang lehzual zawkah chuan an nuam tihzawng infiamna ang chi hmanga zirtir thin tur leh chutiang zirtirna pekna thin Anganwadi Centre-te lo hmang tangkai zel turin kalkhawm nu leh pate a chah a ni.
Thusawitu dang, Pu Lalruatmawia Ralte, CDPO, Aibawk ICDS Project chuan Anganwadi Centre chu chaw tha inpekna chauh a ni lova, kan tu leh fate lo thanlen chhoh zelna atana pawimawh thiamthil hrang hrangte leh taksa hriselna leh mahni invawnfai dan thlenga inzirtirna hmun a nih thu a sawi a. Tin, nu leh pa ten an fate phone an entir nasa lutuk chu an tan a that loh theih thu a sawi a, hemi kawngah hian nu leh pate an fimkhur a pawimawh thu a sawi bawk a ni.ECCE Day hun hman zawh hian Zoram Medical College & Hospital (ZMCH) hmunah Rashtriya Poshan Maah 2025 puala thingphunna hun hmanho nghal a ni.
