Pu C.Lalsawivunga’n Dungtlang hmunhlui Archeological Excavation Carbon Dating Result a puang
Vawiin khan Art & Culture Minister Pu C.Lalsawivunga chuan a pisaah, Art & Culture Department hmalaknaa Champhai District, Dungtlang khaw bula hmunhlui zirchianna atanga carbon sample an lakchhuah result a puang.
North Eastern Council atangin Art &Culture Department chuan he zirchianna kalpuina tur sum a dawng a. Department of History, Higher and Technical Institute, Mizoram (HATIM) nen tangkawpin kum 2024 May thla atang khan zirchianna leh archaeological excavation kalpui tan niin carbon sample an lak chhuah te chu Beta Analytic, Florida, USA-ah test a ni a. He zirchianna atanga a lan danin tum li(4) lai Dungtlang khaw hmun hluiah mihring an lo cheng tawh tih a hriat theih a ni. Mihring lo awm tawhna kumte hi 410-1830 A.D. inkar a ni a. Heng kumte hi carbon dating hmanga chhut chhuah an ni.
Tianhrang thlan atangin ruhro pawh laihchhuah a lo ni tawh bawk a. Beta Analytic, Florida, USA atang thovin kum 1740-1800AD hunlai a mi a ni tih lo nemngheh a ni tawh bawk.
Dungtlang hmunhlui hi kum inchhangbung zatin an luah lo tih a hriat theih a, luah loh kum kar awl pawh kum engemaw chen a awm a ni. Testing dang kalpui mek niin, chanchin kimchang zawk hriat theih thuai beisei a ni.
He result puanna programme tawi buatsaihah hian Art & Culture Pu C Lalsawivunga chuan Mizo hnam rohlu leh hmun hluite, Art & Culture Department lamah report nachang hre tur leh, tichhe lo leh venghim turin Mizoram mipuite a sawm a ni.
He project buaipuitute hi archaeologist pahnih Pu Vanlalhuma Singson (Art & Culture Dept.) leh Dr. Lalhminghlua, Asst. Prof. (Dept. of History, HATIM) te an ni a. Vawiin programme-ah hian anni bakah Art & Culture Department official te leh Dungtlang khaw mi leh sate an tel a ni.
