Operation Jericho ngawrh taka kalpui mek a ni – Home Minister
Home Minister Pu K. Sapdanga’n ‘Operation Jericho’ hming vuaha ruihhlo do beihpui thlak mek chu chhunzawm zel a ni, a ti.
Pu K. Sapdanga’n Akashvani News a hrilh danin Operation Jericho hi March ni 31 khan tawp rih angin lang mah se ruihhlo do beihpui hi thla thlah lova thlak chhunzawm zel a nih thu a sawi a. State thenkhata inthlan a awm avangin Mizoram Police company 6 lai Assam state assembly inthlanna a duty turin tirh an nih thu a sawi a. Hetianga Police indaih lohna a nasat tak avang hian Champhai district-a Myanmar ramri hrula a ruihhlo beihpui thlak hna thawk tura Police dahte pawh hnuhdawh an ngaih thu a sawi a. He tih rual hian Champhai district bakah chhim lam, Lawngtlai leh Siaha district te, Manipur ramri dep Saitual leh Khawzawl district lamah te ruihhlo tawlhrutute’n hlet an chhuah tak avangin a theih ang anga he’ng district-a Police tam zawk ruahman tum mek a ni a ti a. A hma anga Operation Jericho hmanga ruihhlo do beihpui a siruk-la a chhunzawm leh chungchang hi sawiho chhoh mek a nih thu a sawi bawk.
April ni 1 atang khan Mizoramah ruihhlo tawlhruk leh dan kengkawhtute’n an man a pung hle a. Ni hnih/khat chhung lek pawhin heroin tam tham tak man a ni. He mi chungchangah hian Home Minister chuan chhim lama Myanmar ramri hrul a awm district-te bakah Manipur ramri kal tlanga ruihhlo tawlhrutute an insawn tih thu an dawng niin a sawi a. Champhai district chauh ni lo, chhim lam leh Manipur ramri lamah te pawh ruihhlo lo lut tur veng tura thapui an thawh mek thu a sawi bawk a ni.
