Mla pi baryl vanneihsangi hovin young indians parliament 2026 ni hnihna hmang
Vawiin khan MLA Pi Baryl Vanneihsangi chuan Young Indians (YI) Mizoram Chapter-in Mizoram Assembly Annexe Conference Hall-a a buatsaih Young Indians Parliament ni hnihna leh a tawpna chu khualzahawm niin a hmanpui. Pi Baryl Vanneihsangi chuan zirna tha leh thiamna hmantlak neih a tul zia sawiin, politics ah pawh zirna a pawimawhzia a sawi a; lehkhathiamlo a ram hruai tum chu mipui te tan a himloh thu a sawi. Pi Baryl Vanneihsangi chuan politics bulpui ber chu mipui rawngbawl hna anih thu sawiin, mipui rawngbawl hna hi kawng awlsam a ni lova, huaisenna, rinawmna leh inpekna a pawimawh hle a ni ti. Politician tha awmzia chu room chhunga au ring ber ni lovin mipuite harsatna ngaihthlaksak a, an harsatna sut kian sak tura theihtawp chhuah thin te hi an ni, a ti.
Pi Baryl-i chuan ram rawngbawl tur hian naupang luat a awm lova thil thlak danglam tur chuan kum naupang zawkte hi an tha a, politics hi tawp chin nei lo intlansiakna a ni a, hriatthiamloh leh chak loh chang awm mahse rawngbawlna chhunzawm zel a ram hruaitu tha tak ni theuh turin intihsiaknaa tel te chu a fuih a ni. Intihsiak ni hnihna hi matters of urgent public importance sawihona-in tan a ni a, constituency hrang hrang atanga sawihona neih a nih hnuah intihsiakna chhunzawm a ni.
Pu Alan Lalhriatpuia, Chair YI Mizoram Chapter chuan kal khawmte lawmna thu a sawi a. He intihsiaknaah hian Pi Hannah Lallawmpuii chu Chief Judge niin Dr. Jerry Lalmuansanga leh Dr F. Lalramhluni te chu judge an ni a, Pu Vanlalzawma, Ex MLA leh Pi Baryl Vanneihsangi te chu Special Jugde an ni. Intihsiaknaa tel te hi criteria hrang hrang hmanga endik an ni. Pu Francis L Khiangte, Co-Chair YI Mizoram Chapter chuan lawmthu sawina in hun a khar a ni.
