Mizoram Larsap-in Shalom Special School zirlaite a kawm
Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan Shalom Special School, Serchhip zirlaite chu Durbar Hall, Lok Bhavan, Aizawlah a kawm. Shalom Special School zirlaite hian Serchhip Battalion, Assam Rifles buatsaihin April ni 13-23, 2026 chhung hian Aizawl, Silchar, Shillong leh Cherrapunji-te tlawhin Study Tour an nei a ni.
Larsap General (Dr) Vijay Kumar Singh chuan Assam Rifles-in Shalom Special School, Serchhip zirlaite khawhai tizau tur leh, school hungchhung piaha tawnhriat an neih nan ti a study tour an buatsaih chu lawmawm a tih thu a sawi a. Zirlaite hmangaih taka enkawl thintu zirtirtu leh nu leh pate chhuanawm a tih thu sawiin, tour chuan Shalom Special School leh zirlaiteah hmasawnna rah duhawm tak a thlen ngei a beisei thu a sawi a. Assam Rifles hotute chu an theihna zawn apiangah Shalom Special School ngaihsaka chhawmdawl zel turin a chah a ni.
He hunah hian Shalom Special School zirlaite hian Larsap hnenah thilpek an hlan mai bakah study tour chu nuam an tih thu an thlen a. An School chungchang leh tour hlimthlate thlir ho a ni bawk. Shalom Special School, Serchhip hi August ni 17, 2005 khan Chief Minister hlui Pu Lal Thanhawla’n a din a. Tuna an school building ni ta sakna tur lungphum hi Mizoram Larsap hian Eastern Army Commander anih lai, January 2010 khan a lo phum sak tawh a; 4th Assam Rifles te’n Military Civic Action kaltlangin an sak sak a ni.Shalom Special School, Serchhipah hian vohbik zirlai 36 an awm mek a ni.
