Mizoram Larsap hovin Gujarat, Maharashtra, Sikkim leh Goa-te dinchamphaphak lawm
Ek Bharat Shreshtha Bharat hmalakna hnuaiah Mizoram Larsap, General (Dr) Vijay Kumar Singh, PVSM, AVSM, YSM (Retd) hovin vawiin khan Gujarat, Maharashtra, Sikkim leh Goa-te state puitlinga hlankai ni ‘Foundation Day’ lawmna chu Durbar Hall, Lok Bhavan, Aizawlah neih a ni.
Larsap General (Dr) Vijay Kumar Singh chuan Prime Minister Pu Narendra Modi hmalakna hnuaia hnam inpumkhatna programme ‘Ek Bharat Shreshtha Bharat’ chu Lok Bhavan leh Lok Niwas hrang hrangahte hman thin a nih thu a sawi a. India rama chengte zingah hnam ziarang, nunphung, ei leh in, incheina leh a dangahte inanlohna nasa tak a awm thu leh state pakhat chhungah ngei pawh hmuh theiha a awm thu sawiin, he kan inanlohna hi India danglam bikna, ropuina leh chakna a ni, a ti a. State palite chanchin danglam bikte sawiin, India ram state hrang hrangte hian mawina bik an nei theuh a ni, a ti a. Programme hlawhtlin theih nana hnam lam leh zai entirtute fakam tiin, hun hman chuan India ram hriat chian lehzual kawngah kalkhawmte a puih ngei a beisei thu a sawi bawk.
He hunah hian Gujarat Larsap Pu Acharya Devvrat, Maharastra Larsap Pu Jishnu Dev Varma, Sikkim Larsap Pu Om Prakash Mathur leh Goa Larsap Pu Pusapati Ashok Gajapathi Raju te thuchah bakah state hrang hrangte chanchin tarlanna video tawi hmuhnawm tak tak thlir ho a ni a. College of Veterinary Sciences & Animal Husbandry leh Government Mizo Higher Secondary School zirlaite’n hnam lam leh zai mawi tak tak an entir a. Hemi hnu hian Larsap chuan hemi puala kalkhawmte hi Upper Lawn, Lok Bhavan-ah kawmin hun hlimawm tak an hmang ho a ni.
Gujarat leh Maharashtra-te hi May ni 1, 1960 khan state-ah hlankai an ni a. Sikkim hi May ni 16, 1975 khan state puitlinga hlankai niin, Goa hi May ni 30, 1987 khan state puitlinga hlankai a ni.
