Mizoram ah lirthei a pung zel
Mizoram Transport chhinchhiah danin, kumin March thla tawp thlengin Mizoram chhungah lirthei nuai 3 sing 6 sang 3, 435 register a ni tawh. Lirthei register zingah hian lirthei ke hnih nei, two wheeler chu register tam ber a ni a, tun dinhmunah Mizoram pumah two wheeler nuai 2 sing 2 sang 9, 183 register tawh niin hemi dawt-ah hian mimal motor LMV 55,343 register a ni tawh bawk.
Transport Department-in a a tarlan danin, tun dinhmunah Two Wheeler Taxi Mizoram pumah 4,109 a awm mek a, passenger phur motor-te ke li nei 59,889 awm mekin passenger phur motor tho ke thum nei chi 6,386 Mizoram pumah register tawh a ni bawk a, heng bakah hian sumdawnna atana hman, motor lian bungraw phur chi 23,517 register tawh a nih bakah Car rental a tlan lirthei 2,383 a awm mek bawk.
Transport Department-in thla hmasa thlenga Mizoram a motor register tawh a chhinchhiahna-ah hian Mizoram chhungah Bus 560 awm mekin Ambulance 275 register a ni tawh bawk a, lei laihna lirthei, Excavator pawh a vaiin 1,198 register a ni tawh bawk.
