Irrigation minister-in minister of state for jal shakti kawm

Tukin khan Mizoram tlawha cham mek Raj Bhushan Choudhary Minister of State for Jal Shakti, Department of Water Resources, River Development and Ganga Rejuvenation chu Pu PC Vanlalruata, Minister Irrigation and Water Resources Department, Mizoram chuan Lok Bhavan (Governor chenna) ah a hmu a, Mizoram tana thil pawimawh tak takte leh mamawhte a lo thlen a ni.

He an inkawmnaah hian Minister Pu Ruata chuan Mizoram hian ruahtui dawngtha viau mah ila a dah khawlnate kan neih that loh avang leh tlangram chhengchhe tak kan nih avanga tuia harsatna kan tawh dante sawifiah a, tui dah khawlna tha zawk, tuikhuahte hmanga irrigation project kan neih theihna tura hma lakpui turin Union Minister hi a ngen a ni.

Pu Ruata hian Mizoramin leihnuai tui verh chhuah hmanga (Irrigation) kan hlawkpui zia sawiin, he project hi tih tawp tumna a awmnia a hriat thu sawiin, chhunzawm leh a nih theihna turin a ngen bawk a ni. Tlangram kan nih avang a loneitute hnena tui pekna tur Rate (Cost Per Hectare) chu keini ang tlangram tan chuan a beitham avangin a bik taka North East-te tan ennawn sak leh turin a ngen bawk.

Mizoram Chief Minister Pu Lalduhoman Union Minister hnena lehkha a lo ziah tawh Mat Valley Integrated Project, Rs 274.25 Crores, Irrigation and Water Resources Departmentin DPR a siam, Bramaputra Board a thawn thlak tawh chu enzui sak a a rangthei ang ber sanction turin a ngen bawk. Solar pump leh PMKUSUM hmanga tlangram tui pekna rate hniam bik te pawh tih san turin a thlen bawk.

Mizoram leh tlangram dangte nena hman tangkai tur National Hill Water Security Mission-din a tlangramte tuia harsatna sut kian dan tur ngaihtuah sak turin Union Minister hi a ngen bawk a, inkawmna hun tha tak neiin Union Minister pawh hian  Delhi-ah Secretary-te lo sawipui a tum thu in a chhang a, hun rem changah Mizoram lama a enkawltu Department te nen chiangkuang zawk sawihona hun ruahman a tum thu a lo hrilh bawk a ni.