Minister prof. Lalnilawma chuan keifang loneitute hnenah cocoa tiak a sem
Rural Development Minister leh Tawi bialtu MLA ni bawk Prof. Lalnilawma chuan a bial chhunga Keifang loneitute hnenah vawiin khan Keifang VC Hall-ah Cocoa ṭiak a sem.Keifangah hian Cocoa chingtu chhungkaw 16 an awm mek a, a ṭiakte hi Minister Prof. Lalnilawma chuan a MLA fund aṭanga a leisak a ni. Thu sawiin Prof. Lalnilawma chuan sawrkar chuan mitin ‘Fairel bel thleng phak’ nih tumin theihtawp a chhuah thu a sawi a, ‘a sawi chauh ni lo, a tiha tih’ a tum zel avangin a sawi tawh chu bawhzui zel a tum thu a sawi. Cocoa tiak an phunte chu a lo puitlin huna mimal tin ten mahni in chhungkhur aṭanga ei zawnna ṭha tak an neih phah ngei a beisei thu a sawi a ni.
Minister chuan kuthnathawka ei zawngte hian dinhmun tha zawk a an din theih nan Sawrkar in theihtawp a chhuah thu sawiin, hmalakna hrang hrang te hi a hlawhtlin theih nan chuan beneficiaries/ partner (kan thawhpui te) an pawimawh thu a sawi a. Heng hmalaknate hi a hlawhtlinna hmuh ngei theih nan kan vaiin thawhhona tha tak hnuaiah, taima tak leh rinawm takin kan thawhho zel a pawimawh a ni, a ti.
Vawiina Cocoa tiak semna hun hi Zo-Troy Agri-Horti Farmer Producer Company Limited leh Kangmual Farmers Association tangkawpa buatsaih a ni a. Keifang chu cocoa chinna atan hmun tha a ni thei dawn em tia enchhinna pilot project a ni.
