Mamit District DC in District Hospital-a dam lo mamawh te tan ambulance a hlan
Vawiin tlai khan Pu Suvigya S Chandra, IAS Deputy Commissioner chuan Mamit District Hospitala dam lo mamawh te’n tangkai taka an hman atan Ambulance a hlan.
District Bawrhsap chuan Mamit District chhunga dam lo mamawhtute’n tangkai taka an hman a duhsak thu sawiin, Aspirational District kan nih anga hamthatna leh duhsakna hrang hrang kan dawnte hman tangkaina chang kan hriat a pawimawh thu a sawia, damlo hmunpui zawk pan ngaite, nu nau nei tur rang leh awlsam zawk a, damdawiin pan pui an nih theih nana thil tangkai tak nise a duh thu a sawi.
Dr. Malsawmsanga Khiangte, District Medical Superintendent pawhin Mamit District Hospital-in an mamawh em em Ambulance thar tha tak mai ngaihtuah sak tu Pu Suvigya S Chandra, Deputy Commissioner chungah lawmthu a sawi a, damlo leh a mamawhtute’n tangkai taka an hman ngei a beisei thu a sawi.
India ramchhunga District hnu fual te chawikanna tur NITI Aayog hnuaia Aspirational District Programme (ADP) kaltlanga District chawikanna hian Health leh Nutrition te a huam tel a, Mamit District Hospital-in Ambulance an kawl lai chu kum 2020 atanga kawl tawh a nih avangin damlo te hmunpui zawk panpui turin a chak tha tawk loh avangin District Administration atanga Ambulance thar hi dil sak an ni.
