Lungleiah dan dik lova family pension late chhui chhuak turin task force an che chhuak ṭan
Mizoram sawrkar Finance Department thu chhuak angin Task Force Team No. 4 (Lunglei District) chuan vawiin khan Team Leader Pi Lalruatzeli, Treasury Officer, Lunglei hovin Lunglei District chhungah dan dik lova family pension la an awm leh awm loh chhui chhuak turin family pensioner-te a hmunah kal chilhin endikna an kalpui ṭan.
Task Force hian family pensioner awmna veng hrang hrangah kal chilhin, chhungte sawrkar hna thawk boral tawh pension hlawh dan dik lova laksak an awm leh awm loh zawng chhuak turin family pensioner-te dinhmun an endik a. Local Council (LC), Young Mizo Association (YMA) leh Lunglei District Pensioners Association (LDPA) te’n a hmunah lo buaipuiin, family pensioner-te pension lak dan a dik ngei em tih an enfiah bakah, pensioner-te chu Treasury-a a hranpaa in-report ngai lo turin, an lehkha pawimawhte an chin felsak nghal bawk a. Spot verification-ah hian an endik tawh chinah rinhlelh kai, insawi fiah tura hriattir (show cause notice pek) pakhat an nei.
Task Force hian family pensioner-te endiknaah hian Aadhaar Card attested copy leh Life Certificate an endik a. Endik hmabak an neihah pawh Aadhaar Card attested copy leh Life Certificate chu endik theih tura lo inring lawk ṭheuh turin family pensioner-te an ngen.
Mizoram sawrkar chuan danin a phal loh leh document dik lo hmanga family pension late tan July 1, 2026 aṭanga September 30, 2026 chhung khan mahni duh thu ngeia Pension Payment Order (PPO) pek kir (surrender) theihna hun hawngin, hemi chhung hian Lunglei District-ah PPO surrender mi 137 an awm a. Dan dik lova family pension la, hemi hun chhunga pe kir lote chu an chungah dan anga hma lak tur niin, Task Force hian chuti ang zawng chhuak tur chuan endikna hi an kalpui a. Lunglei District Task Force hian November 2–13 chhungin Lunglei khawpui chhungah endikna hi kalpuiin, hemi hnu hian District chhung khaw hrang hrangah an kalpui chhunzawm ang.
