Lunglei DC Office leh Disha Foundation ṭang kawp huaihawta Lunglei District-a English Language Foundation (ELF) 2.0 kalpui tur hawn a ni
Lunglei District-a primary sikul zirlaite’n English bulṭhut thiamna kawnga hma an sawn theihna tura Lunglei Deputy Commissioner (Bawrhsap) office leh Disha Foundation te ṭang kawpin a thawh hnihna atana English Language Foundation (ELF) 2.0 an ruahman chu vawiin khan Lunglei District Bawrhsap Pi Navneet Mann chuan a hna thawh pindanah a hawng.
Bawrhsap Pi Navneet Mann chuan Lungsen Aspirational Block-a primary school sawmah ELF thawh khatna hlawhtling taka kalpui a nih tawh thu sawiin, Lunglei District chhung sikul danga ELF thawh hnihna kalpui chhunzawm theih a ni tur chu lawmawm a tih thu a sawi a. ELF hlawhtlinna tura kawng hrang hranga thawhpuitu Disha Foundation chungah lawm thu sawiin, Education Department-a thawktute, Officer incharge-te leh ELF 2.0 kalpuina tur sikul zirtirtute chu programme hlawhtlinna tur leh zirlaite’n an sawtpui theihna tura theih tawp chhuah ṭheuh turin a chah.
ELF 2.0 hawnna hun hi Lunglei Sub-Deputy Commissioner Pi Lalnunchhani Hnamte chuan a kaihruai a. District Education Officer Pu Micky R. Lalenkawla’n lawm thu leh fuihna thu sawiin, Disha Foundation aṭangin ELF 2.0 kalpui dan tur ruahmanna ngaihthlak a ni.
Hawnna hun hman zawh hian orientation training buatsaih zui niin, Disha Foundation Team te’n zirtirtute tana hriat tur pawimawh hrang hrang an zirtir a. Zawhna leh chhanna leh sawi hona hun hman a ni bawk.
ELF 2.0 hi Lunglei District chhunga sawrkar primary sikul thlan bik sawmah kalpui tura ruahman a ni a. Lungsen Aspirational Block-ah sikul 6 – Lungsen-I, Lungsen-II, Chhumkhum, Phairuangkai, Tuisenchhuah leh Zawlpui Government Primary School (GPS)-te; Lunglei Municipal Council (LMC) huam chhungah sikul 2 – Electric Veng-I leh Rahsiveng-II GPS-te; Bunghmun Block-ah Bunghmun-I GPS leh Tlabung Block-ah Tlabung-I GPS te thlan chhuah an ni a. He’ng sikulah te hian belh khawmin zirlai 468 an awm.
Ruahman lawk dan chuan, ELF 2.0 kalpui turah hian Disha Foundation lam aṭangin zirtirtute hi a hmunah leh online kal tlangin training pek an ni ang a. Disha Foundation aṭangin zirna hmanraw chi hrang hrang – teaching aids, workbook leh video te rawn thawnin, chumi hmang chuan zirtirtute’n an sikulah ṭheuh an zirlaite an zirtir zui dawn a. Kum 2026–2027 session first term exam zawh aṭangin zirlaite training hi kalpui ṭan tur niin, zirlaite hmasawn dan finfiahna turin a khat tawkin test buatsaih ṭhin a ni bawk ang.
